India tan Qatar an sang hret
FIFA World Cup qualifier-ah India chuan Thawhlehni zan khan Qatar an mikhual a, Asian champion hi Blue Tigers tan an ṭha lutuk hret a, 3-0 in India an tlawm.
India hian tun international break-ah World Cup qualifier match hnih khelin, match hmasa zawkah Kuwait chu 1-0 in khualmualah an hneh a, hei vang hian Blue Tigers hian inrintawkna nen Qatar an mikhual.
Mahse, Carlos Quieroz enkawl team hian India tan chuan an la ṭha lutuk hret tih an pholang a, Moustafa Mashal, Almoez Ali leh Yusuf Abdurisag ten goal khat ṭheuh khungin, 3-0 in Qatar an chak.
A harsa
India coach Igor Stimac-a'n Kuwait hnehtu team aṭangin player panga a siksawi a, AIFF Player of the Year Lallianzuala Chhangte pawh bul ṭantu zingah telin, Lalengmawia Ralte (Apuia) pawhin bul a ṭan bawk.
Stimac-a thutlukna maksak zingah Gurpreet Singh Sandhu chu bench-ah dah niin, Amrinder Singh-a'n si ban nghakin bul a ṭan a, beisei a phak lo.
India hian minute lina lekah goal an chhuah nghal a, Akram Afif-a corner aṭanga ball kal chu Moustafa Mashal chuan goal-ah a chantir a, India an hawihai.
Roreltu Qatar
India an insiamṭha lo, goalkeeper Amrinder a chesual zui a, a ball pek sual aṭanga ball kal zel chu Sandesh Jhingan chuan a dang hman hlauh a, Amrinder a vannei.
Minute thum a liam a, Amrinder a insiamrem zui - Qatar tana Afif-a chance neih duhawm chu Odisha FC keeper hian ṭha zetin a dansak a, India an him.
Minute 42-naah India-in chance an nei ve zui a, mahse, Anirudh Thapa chuan Sunil Chhetri thawhrah senga chance duhawm a neih chu engmah lo maiah a chantir a, India hun duhawm a khawhral.
A tawpah Qatar
Goal khata hnufual chungin India-in chawlhlawk an hmang a, second half-ah an insiamrem hmain Qatar-in goal an rawn khung zui - second half ṭan aṭanga minute khatna lekah Almoez Ali chuan goal hnihna a khung.
Kalinga-a inkhelah India tan engkim a harsa tawh tih a lang a, hun tawp nan minute nga chiah a awm tawh tihah Yusuf Abdurisag chuan goal khat khung ve lehin, 3-0 in Qatar an chak.
India tan hun tawp dawnah defender Lalchungnunga chu bench aṭanga luhtir a ni bawk a, Durtlang tlangval hi senior team tana a inlan hmasak ber a ni.
Danglamna
India tan Qatar an la u hret a, Mumbai City forward Lallianzuala Chhangte pawhin hei hi a pha lo. Lunglei forward chuan, "Team ṭha zawk leh tawnhriat nei ṭha zawk an nihna a lang a ni.
"Mahse, zawi zawiin hma chu kan sawn ve zel e," tiin Vanglaini a hrilh a, Qatar lakah chak zo lo mah se hmasawnna hmuh tur a awm thu a sawi.
Lianzuala chuan sawi zawmin, "Thutlukna siam kawngah kan tluk lo a, an chance neih ho an hlah lo bawk, " a ti a, chu chu India tana inzirna tur a nih thu a sawi.