Euro 2024 khel tur team 21 a chiang, pathum an la zawng dawn

UEFA Euro 2024 qualifying chu November 10, Thawhlehni zan khan khelh zawh a ni a, team 21 khel tur a chiang tawh. Team pathum la chiang lo hi playoff hmanga tihchian tur a ni a, playoff khel tur hi Euro 2024 qualifying-a an chet ṭhat dan ni loin Nations League-a an chet ṭhat dan a zirin an thlang zawk.

Team 21 chu

Germany-in Euro 2024 an thlen dawn avangin an tling sa a, team dang 20 hi playoff aṭanga zawn a ni. Playoff-ah hian Euro 2024-a team 53 chu group 10-ah ṭhen darh an ni a, a sang pahnih zel an tling.

Group A-ah Spain leh Scotland an tling a, tling lo langsar chu Norway an ni a, Erling Haaland leh Martin Odegaard ten Euro 2024 an khel dawn lo. Group B-ah France leh Netherlands te an tling a, Republic of Ireland an tel pha lo.

Group C aṭangin ram langsar England leh Italy te an tling a, group D-ah Turkey leh Croatia te an inpettling bawk. Group F aṭangin Belgium leh Austria an tling a, Sweden an tel dawn lo.

Group G-ah Hungary leh Serbia an tling a, group H aṭangin Denmark leh Finland an tling. Group I aṭangin Romania leh Switzerland bakah group J aṭangin Portugal leh Slovakia te an tling. Ram langsar an tling ṭha hle.

Playoff ve thung

Nations League hi friendly thlak nana tih a ni a, UEFA ramte chu an thiam dan a zirin league paliah ṭhen darh an ni. League A, B, C leh D-a ṭhen darh an ni a, league hmasa pathum ṭheuh hian playoff hmangin quota pakhat ṭheuh an nei.

League A bik hi group paliah ṭhen leh a ni a, chutihrualin league A-a awm pha chin tan chuan playoff spot a awm vekah a ngaih theih zawk. Qualifying round aṭangin an inpettling deuh vek a; Poland leh Wales te chiah an bang. Hmun ruak pahnih a la awm a, League D-a ti ṭha ber Estonia an tel. Pakhat dang hi Path B-a mi Finland, Ukraine leh Iceland te zinga pakhatin an hnawh khat dawn. Draw hi vawiin tlai dar 4:30-ah neih a ni ang.

Path A, Path B leh Path C-in quota pakhat an nei a, a tawi zawngin Poland emaw Wales emaw chuan Euro 2024 an khel dawn lo tihna a ni. Path B group palia pakhatna Israel leh Bosnia and Herzegovina ten qualifying an khelh zawh loh avangin playoff an khel dawn. Team hnih dang hi Finland, Ukraine leh Iceland te zinga mi pahnih an ni dawn a, Path A-a awm aiin Path B-a awm a thlanawm zawk.

Path C-a group pali zinga group thuma pakhatna Georgia, Greece leh Kazakhstan ten playoff an khel dawn. Group pakhatna zinga mi Turkey chu qualifying hmanga an tlin tawh avangin an hnuai chiaha awm Luxembourg in playoff an khel ang. Nations League hmanga playoff khel tur zawn a nih avangin team tenau deuh tan pawh Euro C'ship khelhna kawng a inhawng tihna a ni.