Mendy-a'n City a khing dawn

Manchester City defender hlui Benjamin Mendy chuan Premier League champion City chu a hlawh pek kim loh chungchangah a khing dawn a, a thubuai hi nakkum lamah ngaihtuah a ni ang.

Kum 29 mi Mendy hi September 2021 khan hmeichhe pawngsual chungchangah thubuai siamsak a ni a, hetia thubuai a neih ṭan aṭang hian City chuan Mendy hi a hlawh an pe lo nghal nia sawi a ni a, tunah erawh thubuai an siamsakah hian thiam a chang leh vek tawh thung si a ni!

Mendy hian August 15, 2021 khan City tan league match khelin, hemi hnuah hian a thubuai vangin Pep Guardiola enkawl team tan a inlan leh tawh lo.

Mendy hi thla nga chhung lung inah khung niin, January 2022 khan bail-a chhuah a ni a, August 2022 khan a vawi khat nan court a hmachhawn zui a, January 2023 khan pawngsuala puh a nihna thubuai paruk leh mawi lo taka hmeichhe chunga chea puh a nihnaah thiam chantir a ni.

July-ah khan a thubuai hi ngaihtuah nawn ni mah se, thiam erawh chantir chhunzawm a ni ta tho a ni.

Mendy hian thiam a chan takah chuan a club hlui lam hawiin hma a la dawn a, UK infiamna khawvela ukil lar tak Nick De Marco chuan Mendy aiawhin court a hmachhawn dawn a, Mendy hian pound maktaduai tam tak chawi turin City hi a khing dawn niin an sawi.

French defender Mendy hian nipui lai khan City-a a contract hi a hmang zo chiah a, Ligue 1 club Lorient zawm zuiin, ngai a la awh chiah lo - French club tan hian tun season-ah match thum chiah a la khel a, bench aṭang vekin a la lut.

Kum 2017 khan AS Monaco aṭangin City hi pound maktaduai 52-in a zawm a, 2018, 2019 leh 2021 season-ah te khan Premier League nomawi a chawipui a ni.