Bangkok lamah Laldingliana

WBC India champion Laldingliana'n WBC Asia super bantamweight title a chuh dawn. Inhnek hi Inrinniah neih tur niin Thawhlehni khan coach Lalmuanpuia nen Thai khawpui Bangkok an pan.

Suamlum Night Bazaar, Ratchadaphisek-ah champion lai leh Thai number 1 Thattana Luangphon nen an inhnek dawn a, kum 24 mi Dinga'n rin hlawh lo mah se boxing a khelh tawhah inhnek lian ber a ni tih a hria a, beiseina nei chungin a feh chhuak.

Kum 2019 khan LPS Pro Fight bantamweight champion Dinga hi NTP Boxing Training centre-ah ngawrh takin a inbuatsaih a. Nikum June khan Dubai-ah feh chhuak tawhin Alimzhan Tursunov nen an intawng, a inhnekpui hian glove dik lo a bun avangin he inhnek hi awmze nei lo a nih phah a, boxrec-ah ziah luh a ni lo.

Hemi hnu hian ṭum hnih inhnek leh tawhin technical knockout-in a chak ve ve. November 10 khan LPS Arena, Falkland, Aizawlah WBC India bantamweight title hnek chhuakin round khatnaah Pradish A a hneh a, professional huanga tum nga a inhnek tawhah chak vekin mi pali a knockout a ni.

Kum 26 mi Thattana chuan WBC Asia title a kawl mek humhim nan Mizo tlangval hi hman a tum a, professional boxing ṭum 24 a khelh tawhah tlawm nei loin vawi 23 a chak a, knockout-in vawi15 hnehna a chang.

September 30 kha a inhnek hnuhnun ber niin Bangkok-ah unanimous decision-in Sukpraserd Ponpitak a hneh. A hnek nat avangin Rockman tiin a hming lem an phuahsak a, world ranking-ah 69-na a nih laiin Dinga erawh 706-na a ni ve thung.