Point 39,000 neitu James

LeBron James chuan basketball player piang tawh zingah ṭha leh chungchuang bik a nihna a lantir zel. James hian basketball inelna ngaihhlut ber NBA-ah point 39,000 a nei tling ta - amah chauh hi hetiang ti thei hi a la ni.

James hian mellung pawimawh phun tur hian point nga chauh neih belh a mamawh tawh laiin, nimin zing NBA regular season inkhelah point 19 a neih belh a, a club Los Angeles Lakers chu Utah Jazz lakah 131-99 in a chakpui.

Lakers legend Kareem Abdul-Jabbar chuan tun hmain point 38,387 a lo nei tawh a, hei hi record a ni ṭhin. Mahse, tunah chuan James hian a rawn khum ta a, a record ṭha hi tun season kal laiah nasa takin a sawhngheh zel pawh a rinawm.

Kum 38 mi James chuan, "NBA-ah hian player ropui leh sulhnu nei ṭha tak tak, point nei tam leh midang chunga leng mi tam tak an awm tih ka hria. Ka zinkawng tir aṭanga tun thleng hian chutiang mi chu an awm tih pawh ka hria.

"Point nei tam record han siam meuh chuan sawi dan tur pawh thiam a harsa khawp mai, eng tianga lawmawm nge a nih pawh ka sawi mai thei lo," tiin a lawm thu a sawi a, a tan ni hlu bik a ni chiang hle.

Inkhel dangah Indiana Pacers chuan Atlanta Hawks lakah 157-152 in hnehna an chang a, hnehna an chan theih nan point 37 neitu Tyrese Haliburto a thawhhlawk hle; chawlhlawk laiin point 20 ngawtin hniam zawk mah se a tawpah an dingchang.

Darius Garland-a point 32 hmangin Cleveland Cavalier chuan Philadelphia 76ers chu 122-119 in an hneh ve bawk.