Ramsdale duhsaktu Seaman

Arsenal goalkeeper hlui David Seaman chuan amah ang bawka English mi Aaron Ramsdale chu inkhel tam turin a duhsak a, inkhel loa mual sir aṭanga ṭhiante inkhel lai lo en mai mai tur chuan a ṭha mah mah tih a sawi.

Mikel Arteta-a'n a lei tirh chuan Ramsdale hian duhsak a hlawh a, si ban nghaktu rinawm pawh a ni ṭhin. Mahse, nipui bazar lai khan David Raya an la lut a, Spanish goalkeeper an neih hnuah Ramsdale hian hmun a chang ta lo.

Premier League leh Champions League-ah David Raya chu rinrawl a ni a, inelna hniam leh ngaihpawimawh loh deuhah chauh Ramsdale hi a khel phak tawh, inkhelh tam a duh a nih chuan club dang a zawn a ngai dawn ni pawhin a lang.

Seaman chuan, "Arsenal tana a khel phak lo a nih chuan England lama a khelhna lam pawh a nghawng ngei dawn. Nipui bazar kan hlat leh tawh lo, chumi hunah chuan Aaron hian khawi lam nge a hawi dawn tih a pawimawh ang, chu chuan ram lam pawh a nghawng dawn a ni," a ti.

England manager Gareth Southgate pawhin Euro 2024 khel tur player a enthla mek zel a, hmanni deuh khan Ramsdale hi club lama a inlan lo reng a nih chuan Three Lions tan a khel ngei ang tih a tiam thei lo tih a lo sawi tawh bawk - Ramsdale tan ngaihtuahna sen ṭhat a ṭul.