RG Stadium-ah football hmuhnawm a awm dawn

Chhun dar 12-ah MPL club hlun Chanmari Vs Aizawl FC

Mizoram Premier League hi season 10 khelh a ni tawh a, Chanmari FC leh Aizawl FC te hi season tinin champion rinkai an zel. Club hlun pahnih hi vawiin chhun dar 12:00 hian RG Stadium-ah an inkhel dawn a, Zote Toyota MPL10-a inkhel pawimawh zinga mi a ni ang.

Chanmari FC hi table chung berah an awm a, phase 2-ah chak an la neih loh avangin semifinal lut chiang an ni lo. I League club Aizawl FC phei chu a sang pali zingah an tel pha tawh lo a, Chanmari FC an hneh lo a nih ngat phei chuan knockout stage khelh a harsa dawn. Team pahnih hi an ṭhat hrim hrim piah lamah league-a an dinhmun avangin inkhel hi a hmuhnawm ngei tura ngaih a ni.

Hriatthiam har AFC

Aizawl FC hian phase 1 khar nan Project Veng FC 6-0 in an sawp a, an result vangin awlsam taka semifinal an luh a rinawm. Mahse, season bul an ṭan ṭhat bik loh avangin AFC erawh palinaah awmin knockout stage lut turin an dinhmun a chiang lo.

Phase 2 an ṭan meuh chuan I League khelh ṭan a ni tawh a, Aizawl FC-in hahchawlhna hun an nei lo. Ni ruk chhungin I League match hnih leh MPL match hnih an nei a, Chawnpui FC lakah point khat an hlawhchhuah hnuah an elpui ber Chhinga Veng an hneh loh avangin panganaah an tla thla.

I League-ah B. Malsawmzuala hote hian khualmualah match li an khel dawn a, an awm bo chhunga dinhmun chhe taka an din loh nan Chanmari FC lakah result ṭha an mamawh. Chanmari lakah Aizawl FC an indah ṭhat a thiang tawh lo a, an ṭhat dan bera an khelh a ngai ang.

Chanmari ve thung

Chanmari FC-in MPL10-ah chak loh la nei lo mah se phase 2-ah chak an la nei lo. Mizoram Police nen goal awm loa an inhnehtawk hnuin Project Veng FC nen 1-1 in an inhnehtawk. Coach K. Malsawmkima chuan player ṭhenkhatin Santosh Trophy-a kal an zo lo niin Vanglaini a hrilh hial.

Mahse maw, Chanmari hian Aizawl FC nena an inkhel tur an ngaih pawimawh avangin Project Veng lakah player ṭha an hahdamtir hriat a ṭha. CFC hian Kolasib club hi an zuam sual a tih theih a, chutihrualin Aizawl FC an khelh hunah sa huai an ser nghal dawn avangin inkhel a hmuhnawm ang.

Santosh Trophy group stage-a inelna pumpuia top scorer ni thei Lalkhawpuimawia'n Amritsar aṭanga a haw hnuah goal a la khung leh lo a, Kelkang striker Mapuia hian Aizawl FC lakah a theihna lantir a tum ang.

Chanmari hian talent nei ṭha Laltlanzova (Zozoa) leh Lalthangliana (AB-a) te an kawl a, Mala hoten result ṭha an neih theih nan Zozoa leh AB-a ten mawhphurhna an lak theih a ṭul. Chutihrualin team innghahna tur tak chu Mapuia bakah Sialhawk Express R. Laldanmawia te an ni ang.

Tlarhnungah keeper Zothanmawia (T. Mawia) a hmuhnawm ṭhin a, College Veng keeper hmaah hian Mizoram captain Lalrinchhana Tochhawng pawh a rawn inlan tawh ang. Chanmari coach Mala'n Project Veng an hmachhawn ṭumah player a siksawi hnem deuh avangin Aizawl FC an hmachhawn huna a player rem dan tur hriat a châkawm hle.

AFC ṭha zawk

Aizawl FC-in phase 2-ah MPL top scorer ni lai Lalrinzuala an hahdamtir a, Serchhip tlangval hian I League-ah goal li khung tawhin hattrick hial a siam tawh. Chanmari lakah Rinzuala hi a inlan a nih chuan ven bik tur a ni ang.

Rinzuala thlawp tur hian Namdhari FC lakah goal khungtu K. Lalrinfela a awm a rinawm a, mual sirah freekick ropui khungtu R. Lalthanmawia (Amawia) leh R. Ramdinthara (Tharpuia) te an awm a rinawm bawk.

Si ruk lain Aizawl FC an rawn thawk chhuak dawn a, I League club hi eng ang chiaha ṭha nge an nih tih Chanmari lakah fiahin a awm ang. September thla khan Kolasibah club pahnih hi a inkhel tawh a, Chanmari hian Aizawl FC hi 2-1 in an hneh a, team pahnih inkarah hian tu nge ṭha zawk tih hriatthiam a har hle.

Police khingpui tur Chawnpui

Zote Toyota MPL10-ah vawiin tlai dar 2:00 hian pahnihna Chawnpui FC leh pathumna Mizoram Police FC te RG Stadium-ah an inkhel dawn a, an intluktawk avangin inkhel pawh a hmuhnawm khawp ang. Police hi coach Lalbiaksanga Colney enkawl a ni a, Chawnpui hi tun hnaia coach ṭhang duang tak Lalrindika Hmar enkawl a ni thung.

Kumin September thlaa Kolasib-a inelna neih a nih ṭum khan Police leh Chawnpui te hi 2-2 in an inhnehtawk. Lalbiakzuala hmangin Police-in ṭum hnih hma hruai mah se Chawnpuiin Lalrinzuala leh F. Lallawmkima te hmangin a sut ve ve.

Tun ṭumah hian an intawn hmasak ṭuma Police tana goal khungtu leh defender pawimawh ni bawk Rinzuala hi inhliam vangin a khelh theih a rinawm lo zawk a, Electric Veng an hneh ṭum khan Aizawl Venglai right back hi inhliam chungin a khel lui tawh. Police hian defender Lalhmunmawia (Ahmuntea) chu inhliam vangin an chhawr thei dawn lo a, coach BS-a'n tlarhmaa khelh dan tur a duan hmanin tlarhnung khelh dan tur a chinfel a ṭul dawn.

Chawnpui FC pawhin an player pawimawh Vanlalthanga inhliam vangin an la chhawr thei dawn lo. Rindika Hmar hote hian Aizawl FC an chelh hnuin FC Venghnuai lakah point khat an hlawh chhuak a, point ruk aṭanga point hnih hmuh hi MPL champion lai tan result ṭha a ni lo.

Police lakah Chawnpui hian point thum hmuh an mamawh a, semifinal lut tura an elpui an nih avangin hnehna an chang thei lo a nih pawhin chak loh a thiang lo - draw tal a ngai. Police tlarhnung hliam tuar hi Chawnpui tlarhmaa awm David Lalchhuanawma, David Lalthansanga (Avid-a), Tea Chinzah leh Malsawmzela (Valpuia) ten hman ṭangkai theih a ṭul ang.

Mahse, Police tlarhmaah Malsawmfela, Lalfakzuala, Lalbiakhlua leh F. Lallawmkima te an awm a, a chawm turin R. Malsawmtluanga leh H. Lalbiakthanga te an awm. Chawnpui tlarhnung hian hahdam taka an khelh theih bik ring suh.