Scaloni hma hun a chiang lo

Argentina coach Lionel Scaloni chuan an ram team a enkawl chhunzawm zel dawn em tih a sawi chiang thei lo, kum nga chhung hna a thawh tawh hi tun hnaiah a chawlhsan nghal dawn tihna erawh a ni nghal kher lo bawk.

Kum 45 mi Scaloni hian a tirah chuan rin a hlawh tehchiam lo, mahse beisei phak baka ṭhain hna a thawk. Copa America champion a nih pui ringawt pawhin fak a hlawh tawh a, a hnuah ropui takain Qatar World Cup an chawi leh bawk a ni.

World Cup hnuah pawh ṭha takin an khel zui, tun hnai khan Uruguay lakah chesual ve zauh mah se Brazil lakah insiamṭhain hnehna an chang leh nghal, an chak hnu lawk hian khawvel mak tih hlawh turin a hma hun a sawi chiang thei lo.

Scaloni chuan, "Argentina hian kawng hrang hranga enkawl ṭha theitu coach a mamawh, tunah chuan ball chauh ni loin thil dang pawh ka ngahtuah tel ve a ngai tawh, tun hi inngaihtuahna hun chu a ni ang.

"Hetianga ka sawi avang hian ka bang nghal dawn e tihna erawh a ni lo, chutihrualin beiseina a san em avangin thil hi a harsa ve bawk. Ka naute hian hun harsa paltlangin dinhmun ṭha an chang a, chuvangin thutlukna ka siam hmain FA president leh player ka bia ang," a ti.

Kum 2018 August thla khan Jorge Sampaoli thlakin Scalioni hian Argentina hi a enkawl ṭan, senior team a enkawl hma chuan under-20 team a enkawl ṭhin. Copa Amercia 2021 an lak khan kum 28 hnua an ramin nomawi lian tham an chawi lehna hmasa ber a nih avangin an hlut hle.

Argentina leh Tottenham defender Cristian Romero chuan, "Scaloni hi chhuak loa a cham zel kan beisei. Kan awmkhawmna hmunah chuan engmah a la sawi lo, kan hnena awm zel turin a rilru hmin pawh kan tum tur a ni ang," tiin a sawi.