Futsal inelna boruak a 'hot' ṭan

Mizoram Football Association leh Tlangnuam Games & Sports Association buatsaih D. Buanga & Sons Inter Village Futsal Tournament 2023-ah nizan khan last 16 khelh zawh a ni a, he thu ziah lai hian quarterfinal lut team pariat aṭangin team paruk a hriat hman.

Chawnpui, Zemabawk North leh Kanan te quarterfinal khel tura an inpettlin hnuin November 22, Nilaini zan khan Ramhlun Vengthar, Sihphir Venghlun leh Dinthar A te an inpettling leh bawk.

Ramhlun Vengthar an ṭha a, an khingpui Sihphir a ṭhat ve tho avangin 5-4 in an chak hram. Sihphir Venghlunin Tanhril lakah team ṭha an ni tih pholangin 8-4 in an chak a, Dinthar pawhin futsal thiam veng an ni tih an nemnghet. Dinthar hian team ṭha Ramhlun Venglai chu 5-3 in an hneh a ni. Nizan khan inkhel pahnih a awm a, result kan hre hman lo.