February 20 aṭangin Veng/khua inelna LPS Cup

Aizawl DFA leh LPS ṭangkawpin nakkum hian LPS Inter Village Football Tournament an buatsaih dawn a, inelna hi February 20, 2024 aṭanga khelh ṭan tur a ni. Inelnaah hian Aizawl District chhung veng leh khua hrang hrang tan a tel theih a, MFA-in ADFA a phalsak angin district dang team sawm bikte an tel thei bawk ang.

District dang aṭanga tel tur team sawm bikte hi round of 32 aṭangin an khel ṭan dawn. Inelnaah hian January 31, 2024 thleng veng/khua tel tum tan a inziah luh theih.

Player-in vote an neihna veng emaw khua emawah an khelh a ngai a, team pakhat tan an veng emaw an khua emaw tel lo tur aṭangin player player panga thleng lak theih a ni ang. Mahse veng/khaw pawn aṭanga player lak hi playing eleven-ah pathum chauh an inlan thei dawn.

Round of 16 aṭangin fixtures pawh ṭhat leh tur a ni a, quarterfinal-ah team pariat chu group pahnihah pali ve vea ṭhen hran tur an ni a, group khat aṭangin a sang pahnihin semifinal an lut ang.

Champion team-in Rs 1,50,000 leh trophy an dawng ang a, pahnihnain Rs 70,000 leh trophy an dawng dawn. Semifinal-a chak lo team pahnihin Rs 20,000 ve ve an dawng dawn. Fair play bakah best player leh top scorer te thlan an ni ang.