India tan mutthluk a hun tawh lo - Wenger

Arsenal coach a nih avanga hriat hlawh, tuna FIFA Chief of Global Football Development ni ta Arsene Wenger chuan, "Milian mutthlu" tia football khawvela sawi ṭhin India tan mutthluk a hun tawh loh thu a sawi.

FIFA-AIFF Talent Academy hawng tura India-a lo kal Wenger chuan, "Football khawvelin hma a sawn zel lai hian nangni hi kan hnuchhawn ngawt thei lo che u. Kan zingah in lo tel ve a, hma lam pana ke kan pen ruala ke min penpui a ngai.

"Tunah chuan football khawvela milian mutthlu chu a ṭhangharh ṭan mek a, football hmasawnna chu kan hmaah hmuh turin a inchhawp thuai dawn e," a ti a, India tan beiseina a nei sang hle.

AIFF president Kalyan Chaubey chuan, "Thawnthu hlui sawi a nih apiangin vawiina kan thil tawn hi sawi a ni zel tawh ang. Vawiinah a hlutzia la hrethiam lo mah ila, nakinah kan hria ang," a ti a, football academy thar hawn a ni chu lawmawm a tih thu a sawi.

Academy chu

All India Football Federation (AIFF) chuan November 21, Thawhlehni khan Odisha sorkar nen football academy din tur hian thawhhona thuthlung, Memorandum of Understanding (MoU) an ziak.

Bhubaneswar, Odisha-a awm tur AIFF-FIFA Talent Academy-ah hian kum 14 hnuai lam, player 50-te chu football zirtir an ni dawn a, an zinga 15 chu Odisha state mi an ni ang a, a bak zawng chu India ram hmun hrang hrang aṭanga thlan bikte an ni ang.

FIFA ruat bik coach chuan he Academy hi enkawlin a kaihruai ang a, ani pui tur hian coach leh staff tam tak chu AIFF leh Odisha sorkarten an pe dawn bawk - India tan chuan hmasawnna chi khat a ni.

He Academy bul ṭanpui tur hian Wenger-a lo kalpui FIFA technical team aṭanga lokal, mi pariat lai chu an chambang dawn bawk a, Indian football-in hmasawnna hmel a hmuh theih nan hna an thawk dawn.

Magic a ni lo!

AIFF president Kalyan chuan, "FIFA-in football hmasawn theihna anga min hmu hi kan tan chuan thil lawmawm a ni a, he thawhhonaa tel tur hian a duh apiang chu kan sawm a ni.

"FIFA hian football tihmasawnna tura magic hmanga hnathawhna tur emaw World Cup khelh nghal theihna tur min pe lo. Kan kal zel dan turte min kawhhmuh a, min thlawp turin an lo kal a ni zawk," a ti - thawklehkhatah hlawhtlinna hmuh nghal beisei lo turin mipui a ngen.

Arsenal tana Premier League nomawi pathum chawitu Wenger chuan, "India ka rawn kal thei hi ka lawm a, he ram hian hmasawn turin theihna a nei tih ka hmu. Kan thawhho phawt chuan tuna kan dinhmun aia sang zawk hi kan thleng thei ang tih ka chiang.

"Mi tluklehdingawn 1.5 awmna ram in ni a, a tam takzet. Chumi awmzia chu hmasawn turin theihna a awm, tihna a ni tel nghal. Economy ang zawnga thlir pawhin India-in hma a sawn a, khawvela infiamna lar ber tihmasawn tur hian theihna in nei a ni," a ti a, beiseina a nei sang.

A rei ta

AIFF president Kalyan chuan an academy buaipui chu phur thut thil tih a nih loh thu a sawi a, AIFF hotupa chuan, "Thla thum dawn chu he ruahmanna chungchang hi kan sawi ho tawh a, Wenger-a min puihna leh a tawnhriat piahlamah, FIFA aṭanga thlawpna kan hmuhte nen, academy hlawhtling tak kan din kan ring tlat a ni.

"India rama football tihma-sawntu mai ni loin, football khawvela kan hming nem kai ve turin thawk ila, nakinah vawiina thil thleng hi chhuang takin kan la sawi thei dawn a ni," a ti a, a phur hle.

Wenger chuan, "India hian ka ngaihtuahna a luah fo ṭhin a, ka tum ber chu he rama football-in hma a sawn theih nana tha thawh hi a ni. Mi tluklehdingawn khat chuang awmna in ni a, football khawvela in hming a lang ṭhin lo nen hian a inhmeh lo a ni," a ti.

French coach chuan sawi zawmin, "Japan-in kum 1995-a football hmasawnna tura an beih ṭan khan an zingah ka tel ve a, kum 1998 a lo thlen meuh chuan World Cup an khel tawh. Kan beisei hi a tih theih a, bul ṭan hma erawh a ngai," a ti a, beiseina a nei.

Milian mutthlu?

Football khawvelah India chanchin hi, "Milian mutthlu" tiin sawi a ni fo a, "A lo ni reng em?" tih hi tam tak thinlungah zawhna a awm a, "World Cup pawh la khel lo ram 'milian mutthlu' tih fo hi a dik em ni?" tih chu zawhna awm thei a ni bawk.

Mahse, Indian football thawnthu hlui keu letin, Blue Tigers hian, "Milian mutthlu" tia koh hi a phu a, tun hmaa a hlawhtlin tawhnate chhiar chuan, tun dinhmuna Indian football-ah hian lungawi a harsa.

India hian kum 1956 khan Olympics football-ah palina dinhmun an luah a, goal li khungtu India striker Neville D'Souza chu top scorer a ni. Asian Games 1951 leh 1962-ah India hian football-ah gold a la a, 1970-ah bronze lain, 1958-ah palina a ni thung.

AFC Asian Cup 1964-ah India hi pahnihna an ni bawk a, coach ropui Syed Abdul Rahim kaihhruaina hnuaia India vanglai kha 'golden era of Indian football' tia sawi a ni ṭhin - India-in a ropuina neih let tumin a bei mek a, thei tak ang maw?