Czech hnehin Australia an tlang

Mipa tennis team hmanga inelna Davis Cup 2023 khelh laiah Australia chuan Czech Republic 2-1 a hnehin semifinal an lut a, final lut tur chuan Finland an paltlang leh a la ngai dawn a ni.

Nilaini zan quarterfinal inkhelah Tomas Machac chuan Jordan Thompson 6-4, 7-5 a hnehin Czech lamin 1-0 in hma an hruai, best of three khelh turah an dinhmun a ṭha hmasa zawk - world number 12 Alex de Minaur a che fuh lo chhunzawm.

Minuar-a hian set a hloh hmasa a, chu mai bakah a service a hloh leh bawk, a lan dan mai chuan Australia hi 2-0 a chak lo thei dinhmunah an ding. Mahse, Minaur hian Jiri Lehecka 4-6, 7-6 (7-2), 7-5 a hneh letin an ram beiseina a siamsak.

Ram pahnihten match khat ve veah hnehna an chang a, doubles hmangin a tlang tur zawk zawn a ni. Inkhel pawimawhah Wimbledon 2022 double champion Matthew Ebden leh Max Purcell te inkawp chuan Lehecka leh Adam Pavlasek te chu 6-4, 7-5 a hnehin an tlang.

Nizan khan quarterfinal inkhel dangah Great Britain chuan Serbia an hmachhawn a, world number 1 Novak Djokovic chuan an ram Serbia tana Davis Cup chawi ngei a tum avangin thapui an thawh dawn, inkhel dangah Italy leh Netherlands an inkhel thung dawn a ni.

Ruahman dan chuan zanin leh Inrinni zanah semifinal khelh tur a ni a, a tlang pahnih ten Pathianni zanah a thiam ber nih an inchuh chhunzawm leh nghal ang.