Kawhi Leonard chhantu Spurs coach

Nimin zing NBA regular season inkhelah thil thleng danglam tak a awm. Los Angeles Clippers tan Kawhi Leonard a inlan a, a club hlui San Antonio Spurs ṭantuten an lo au el, mahse Spurs coach Gregg Popovich chuan mipui hi a khap!

Leonard hian kum 2011 aṭanga 2028 thleng khan Spurs tan hian a khel a, sulhnu ṭha leh chhinchhiah tlak tam tak a hnutchhiah. Chumi hnuah Toronto Raptors panin tunah chuan Los Angeles Clippers tan a khel mek thung.

Quarter hnihna an khelh laiin Leonard-a'n free throw a theh a, hetih lai hian Spurs fans lamin an player hlui hi an lo 'boo' khum a ni. Coach Popovich chuan au rinna lain, "Second khat lek min lo hrethiam teh u, au el tawh suh u - ṭha takin inkhel mai mai rawh se, kan nihna tak kan lantir zawk tur a ni," a ti.

Kum 2014 khan Leonard hian Spurs hi NBA champion a lo nihpui tawh a, nomawi inchuhna inkhelah Miami Heat chu 4-1 a hnehin series an la, hemi ṭum hian Most Valuable Player a ni hial a, a hoin an champion tia sawi theih a ni ang.

An club tan khel tawh lo mah se Spurs coach Popovich chuan Leonard a hnathawh hi a la hre reng a, club dang tan theihtawp a chhuah tawh chung pawhin zah taka lo dawnsawn a phu niah a ngai, hei hi mi puitling zia pawh a ni.