Nadal hmuh ngei kan inring - Tiley

Australian Open chief Craig Tiley chuan nakkuma Australian Open an khelh hunah chuan, player ṭha bik zinga mi Rafael Nadal an hmuh ngei a beisei thu a sawi a, thutlukna erawh Nadal siam tur a ni thung ang.

Grand Slam vawi 22 champion tawh Nadal hi kumin tir lam khan Australian Open-ah a inlan, hliam tuarin a hnu lamah a la khel zui leh lo. French Open an khelh dawn khan chanchinbumite a kawm a, season thar hi a tan hun hnuhnung a nih tur thu a sawi.

Season thar lo awm tur hi Nadal tan a hun hnuhnung a ni tawh dawn tihna a ni a, champion beisei ngam chiah lo mah se tournament buatsaihtu lam tan chuan an inelna neih turah tel ngei thei se tih chu an duhthusam a ni ngei ang.

Tiley chuan, "Rafa hian training a nei ṭha tawh a, chik takin kan ngaichang reng a ni, a chhan chu kan tournament-ah lo tel ngei se kan duh. Inkhelh pawh a duh ngei tih kan hria, engtiangin nge hma a sawn zel tih chu a pawimawh lai a ni dawn.

"Kan beisei dan chuan tun aṭanga chawlhkar khat emaw chawlhkar hnih emaw hnuah kimchangin kan hre thei tawh ang. Ani hi chuan a theih hram chuan inkhelh hi a duh ṭhin, chutiang rilru pawh chu a la pu reng," a ti.

Nadal chuan engtik hunah nge a inkhelh theih dawn tih chiang takin a la sawi thei lo. Kar hmasa kha chuan duhthusamin a la training ṭha tawk lo tih a sawi a, chuvangin hun chu a la mamawh deuh dawn niin a lang.

Australian Open chief Craig Tiley chuan season khat chhunga Grand Slam hmasa berah hian, tualchhung player Nick Kyrgios chu a inlan theih nan wildcard an pe dawn tih a sawi bawk. Kuminah khan Kyrgios hi hliam vangin a inlan thei lo a ni.