Shaw-a'n training a zawm

Manchester United defender Luke Shaw chuan training a zawm pangngai leh thei ta, thla thum chhung ngawt hliam vanga inkhel thei loin a chawl tawh a, khelmual chhunga a lo kir leh hnai ta hi Man United ṭantute tan chuan chanchin lawmawm a ni ang.

England international hi tihrawl hliam vanga chawl a ni a, season tir lam khan Man United tan Premier League match hnih a khel tih bak chu tun season-ah a club tan a la inlan lo. Wolves leh Tottenham te chauh a la hmachhawn a ni.

Erik ten Hag-a naute hian Pathianni zanah Everton an hmachhawn dawn. Goodison Park an tlawh tur atan hian Shaw hi squad-ah telh a ni tawh a, coach Ten Hag-a'n inkhel tlaka a ngai a nih chuan a inlan thei tawh ang.

Man United hian hliam vangin defender an chawr thei lo nasa. Pre season laia inhliam left back Tyrell Malacia a la chawl a, center back Lisandro Martinez chu October thlatir aṭangin a la chawk bawk - Sergio Reguilon leh Aaron Wan-Bissaka te an la inkhel thei lo bawk a ni.

Shaw awm loh hlan hian Ten Hag-a'n left back atan Diogo Dalot, Victor Lindelof leh defensive midfielder Sofyan Amrabat te a chhawr kual ṭhin, tunah chuan an buaina ṭhenkhat chu an sukiang thei tura beisei a ni.

Manchester United hian Premier League match vawi 12 an khelh tawhah point 21 an hmu a, league table-ah parukna an ni mek. Ten Hag-a hote hian hmahruaitu Manchester City an phak lohna chu point sarih a ni a, match khelh tur a la tam avangin champion hial pawh an la beisei thei ang.