AFC Asian Cup atan ka player tur a chiang tawh - Stimac

India coach Igor Stimac chuan AFC Asian Cup 2023 atan a player tur an chian tawh thu a sawi a, a player koh chiansa a sawi zingah tun hnaia India squad-a koh thar Lalengmawia Ralte (Apuia) a tel.

Blue Tigers hian World Cup 2026 qualifier match hnih an khel zo chauh a, khualmualah 1-0 in Kuwait hneh mah se mikhual Qatar chu 3-0 in an ngam lo thung a, result chhia tia sawi tur erawh a ni lo.

He squad-ah hian Lallianzuala Chhangte, Apuia leh Lalchungnunga te an tel a, Chungnunga hi Qatar lakah bench aṭanga luhtir niin, Durtlang tlangval hian India tana a match hmasa ber a khel.

2023 AFC Asian Cup hi January 12 aṭanga khelh ṭan tur niin, team 24 an inel dawn a, Qatar-ah khelh a ni dawn - Blue Tigers pawhin beiseina sang tak nen FIFA World Cup 2022 thlengtu ram hi an pan ang.

Enchhinna

Stimac hian Qatar laka an tlawm hnu lawkah a ruahmanna hi a sawi chhuak a, Croatian coach chuan, "Qatar nena inkhelah khan result kha kan ngaih pawimawh ber a ni lo a, rei tak ka thinlunga zawhna lo awm tawhte ka chinfel zan a ni.

"Australia nen kan intawn hmain match khelh tur kan nei tawh lo a, chuvang chuan Qatar nena kan inkhel kha kan tan chuan a pawimawh hle. Ka chhanna zawng zawng chu ka nei ta a, kan tan chuan chu chu a pawimawh ber chu a ni," a ti.

Asian Cup 2023-ah hian FIFA ranking-a 102-na India hi group B-ah Australia (27), Uzbekistan (73) leh Syria (92) te nen an awm ho a, January 13-ah match hmasa ber chu Australia nen an khel dawn - hmabak a ko hle.

Group tin aṭangin a sang pahnih ṭheuh leh, pathumna zinga a tiṭha zual palite chu round of 16 lut tur an ni a, Blue Tigers tan an khingpui turte thlirin a sang pahniha tel a harsa dawn - Stimac-a'n inenchhin nana Qatar a hmang hi a awm lo hran lo.

Dinhmun derthawng

World Cup 1998-a Croatia-in pathumna dinhmun an luah theih nana player thawhhlawk tak Stimac chuan, "Ka thil duhah ka chiang tawk tawh. Enge kan tih la ngai ka hria a, player ka hruai turah pawh ka chiang," a ti!

Club lama beisei phak lo Udanta Singh chungah Stimace-a'n rinna a nghat lui ṭhin a, mahse, Manipur winger dinhmun a derthawn thu a sawi. Croatian coach chuan, "Udanta hi kan hnenah a awm rei tawk tawh. A chungah beiseina kan nei sang a, mahse, thil danglam a awm lo.

"Player ṭhenkhat nghak turin hun kan nei lo a, ṭhenkhat hi chu chance kan pe tam tawk tawhin ka hria. Chuvang chuan Udanta hian a club-a a kir a, ram tana inkhelh a phu tih a pholan a ngai," a ti a, Asian Cup khel lo thei dinhmunah Udanta a ding.

Stimac chuan sawi zawmin, "Udanta lakah ka lungawi lo a ni lo a, ka duhsakzia in hria. Ashique Kuruniyan nen hian an tlan chak a, an thatho a, an fei em em bawk. Chuvang chuan anni hi ka duh a, mahse, ni tin in thawkrim a, theihtawp in chhuah reng a nih loh chuan engtik hun pawh hi in hun tawp ber a ni reng thei," a ti a, a ṭawng pa hle.

Apuia a chiang

India national team en vang vang ila, hliam leh thil dangin a tibuai a nih loh chuan Asian Cup khel tur chiang an awm - heng zingah hian Lallianzuala Chhangte a chhiar ngam a, ani bakah Sunil Chhetri, Anirudh Thapa, Sandesh Jhingan leh Gurpreet Singh Sandhu te chu Asian Cup khel ngei tura ngaih an ni.

Stimac hian hming hmerha lam rik erawh a nei a, chu chu Mumbai City midfielder Apuia leh Bengaluru midfielder Suresh Singh te an ni - a bik takin Stimac hi tun hnaiah Apuia nen hian inhmu thiam loa sawi a ni a, tunah chuan Vaivakawn tlangval hian a ruahmannaah hmun pawimawh a chang leh tawh.

Kum 56 mi coach chuan, "Tun international break-ah Apuia hian ram tana khelh a phu tih a pholang a, chutiang bawkin Suresh pawhin a hmun a tichiang," a ti a, player pahnih chu an dam a nih phawt chuan Asian Cup-a a hruai ngei tur thu a sawi.

Stimac hian Rahul Bheke leh Subhasish Bose fakin, Aakash Mishra tan hmasawnna tur a la awm thu a sawi bawk - hriat tur erawh January-ah Asian Cup khelh a ni dawn a, hemi hma hian ISL-ah thil tam tak a la thleng thei.