Inthlahdah a la thiang chuang lo - Bagnaia

Tun season atan MotoGP intlansiak pakhat chiah a awm tawh a, rider championship hmahruaitu Francesco Bagnaia chu point 21 laiin a sang fal tawh. Champion turin a dinhmun ṭha viau tawh mah se chesual thei a ni tih a hria, inthlahdah a thiang lo tih a sawi.

Tun kar tawp hian season khar nan Valencia Grand Prix an tlan dawn. Intlansiak tak hi Pathianniah neih tur niin, chumi hma chuan 'Sprint Race' an tlan leh ang, hetah hian a che ṭha a nih chuan a champion thei tawh dawn a ni.

Ducati rider Bagnaia hian beiseina sang tak nen Losail Circuit a lut dawn. Italian tlangval chuan, "Qatar GP kan tlan zawh hnu khan Jorge Martin aia ka sanna chu point 21 a ni ta a, a nihna takah chuan Valencia pan pawh a phur awmin ritphurh ṭhenkhat chu a kiang.

"Chutihrualin, vanduai chuan intlansiak pakhat aṭang hian point hmu miah loin a awm theih tih ka hria, chu chu keimah chauh ni loin ka team zawng zawng pawhin an hre vek, intlansiak dang kan hmachhawn dawna kan inbuatsaih dan nen a danglam tur a ni lo.

"Valencia hi tunhma lama kan chetṭhat tawh ṭhinna hmun a ni a, ṭha taka tlan turin theihna pawh kan nei. Phur lutuk avanga chetsual a awm thei a, hlau taka hmachhawn chi pawh a ni lo, dan pangngaiin ka tlan theih ka beisei," tiin a sawi.

Pathianni zan dar 7:30 hian tun season atana intlansiak tawp ber tur Valencian Grand Prix chu an tlan dawn a, tun ṭum inelna hi champion chinfelna a ni nghal bawk ang.