Maguire-a'n Ghana MP a ngaidam

Manchester United defender Harry Maguire chuan fiamthu thawh nana amah hmangtu, Ghanaian MP Isaac Adongo chu a ngaihdam thu X (twitter) lamah a tarlang a, "Old Trafford-ah kan inhmu thuai dawn nia," a ti.

Ghana MP Isaac Adongo hian nikum khan budget chungchang an sawinaah, an ram vice president Mahamudu Bawumia-a sum enkawl dan chu khelmual chhunga Maguire chet dan nen a tehkhin a, he thil hi social media lamah a darh nasa hle. Maguire chu, "Tlarhnung laiah United dinhmun tiderthawngtu a ni," a ti.

England manager Gareth Southgate pawhin Maguire hi na taka lo chhan tawhin, an sawiselna chu, "Awmze nei lo a ni," tiin a lo sawi tawh.

Mahse, Thawhlehni khan Adongo chuan Maguire chu fakin, a thil lo sawi tawh chu siam ṭhat a duh thu a sawi a, "Footballer inthlak danglam a ni tawh," tiin Maguire chungchang hi a sawi a, "Tunah chuan Manchester United tan player pawimawh a ni leh tawh," a ti.

Adongo hian an ram vice president Bawumia erawh sawisel chhunzawmin, "Kan Maguire-a ve chu IMF lamah, a kutdawhna bawm nen a ṭhu a ni," a ti - Ghana hi an ram sum dinhmun nasa takin a chhe mek a, Bawumia hi he dinhmun ṭha lo tak aṭanga an ram khai chhuak tura sorkarin a din economic management team-ah an hotupa a ni.

Ghana MP Adongo chuan, "Ghana sum dinhmuna ka lungawi lohzia lantir nan Maguire-a chet dan ka hmang a ni mai a, tunah Maguire hian hma a sawn avangin ngaihdam dil nana hetianga sawichhuah leh hi a phuin ka hria. Football ngainatu ka nih angin, a insiamṭhatna ka tarlan leh hi a pawimawh a ni," a ti.

Adongo chuan Maguire-a'n a ngaihdam dilna a pawm chungchang sawi zuiin, "A inngaihtlawmna hian min hneh em em a, kan inkar chu ṭha takin kan khar a ni," a ti a, Maguire a fak.

Ghana hi tun hnaiah an ram sum dinhmun a chhe hle. International Monetary Fund (IMF) aṭangin dollar tluklehdingawn thum lai an puk a ngai a, December khan inflation chu 54% ni hmanin, tunah erawh 35% a ni leh tawh.