Quarterfinal-ah Satwik-Chirag

Badminton inelna China Masters 2023 khelh laiah, India tlangval Satwiksairaj Rankireddy leh Chirag Shetty te ṭangdun chuan doubles huangah quarterfinal an lut a, mipa singles-ah hian H S Prannoy pawh a thiam zual pariat zingah a inhlangkai ve bawk.

Shenzhen, China-a BWF World Tour Super 750 event-ah Asian Games gold medallist Satwik leh Chirag te hian Japan tlangval Akira Koga leh Taichi Saito te ṭangdun chu 21-15, 21-16 in an hneh, chak tur hian minute 46 chhung hun an hmang.

Indian duo hian an match lehpekah chuan Indonesian player Leo Rolly Carnando leh Daniel Marthin te ṭangdun an hmachhawn leh ang. Tunlai mipa doubles player-ah chuan Satwik-Chirag te hi a hlauhawm leh hmuhnawm zinga mi an ni.

Mipa singles lamah Asian Games bronze medallist Prannoy pawhin quarterfinal lut turin Magnus Johannesen 21-12, 21-18 in a hneh. Denmark tlangval hneh tur hian minute 40 chhung hun a hmang a, a hmabak chu Japanese player Kodai Naraoka a ni ang.

China rama inelnaah hian, thleng sang thei tura beisei zinga mi Lakshya Sen leh Kidambi Srikanth te erawh an match hmasa berah hneh nei loin an zinkawng a lo tawp nghal tawh bawk a ni.

World number 17 Sen-a hian Shi Yuqi chu 19-21 18-21 in a hneh lo a, world number 24 Srikanth chu world champion Kunlavut Vitidsarn lakah 15-21 21-14 13-21 a chak loin a zinkawng a lo tawp nghal ve bawk.