Player pariat inelna buatsaih dawn

Tennis season kal lai chu coronavirus vangin an chawl mek a, hri leng karah hian June 13-14 hian Adria Tour an buatsaih dawn, world number 1 Novak Djokovic-a'n a huaihawt inelnaah hian player langsar pariat an inel ang.

Serbian tlangval Djokovic hian tun kartir lam khan Alexander Zverev leh Sascha Zverev te inlan tur thu a ti chiang a, tun hnai maiah Dominic Thiem, Grigor Dimitrov, Marin Cilic leh Borna Coric te an tel tur thu a puang leh, player inlan tur an hraw viau.

Player pariat tel tur hi an la kim lo a, hmun ruak a la awm. Mi pariat chu group pahnihah ṭhenhran an ni dawn, an inkhelh kual hnuah a sang pahnihten final an khel dawn a ni.

Kum 33 mi Djokovic chuan, "Inelna ṭha tak kan neih theih ngei nan ka theihna zawng zawng ka hmang ang," a ti. First leg chu Djokovic-a chenna Belgrade-ah June 13-14 hian an khel ang, second leg chu July thlatir lama khelh tura ruahman a ni bawk.Djokovic hi Spain-ah a unaupa Marko tlawhin a zin a, inkharkhipin a zui avangin hun rei tak hun a hmang. Tun hnaiah Serbia ramah a kir leh chauh a, a zin chhung pawhin taksa sawizawi leh tennis training a thlahthlam chuang lo.

Season kal laia match 18 chak zawn tawh Djokovic chuan, "Kan chenna inah tennis court a awm a, nitin ka inkhelh theih tho avangin ka vannei hle," tiin a hun hman dan a sawi. Serbian tlangval hian a taksa a sawizawi bakah ṭanpui ngai tan sum pawh a thawh hnem hle.

Djokovic chuan, "Thil reng reng hi a hlawkna leh hlawk lohna a awm ṭhin, tun ṭuma kan thil buatsaih tur pawh hi pawisa zawng chuan a hlawk lo ang, sum hmuhchhuah ang pawh midang tana luan chhuah nan hman a ni ang," a ti.