McLaren-in hnathawk 1,200 vel ban dawn!

British rama car changkang siamtu leh Formula 1 team nei bawk McLaren chu Covid-19 vangin an talbuai mek a, an hnathawktu hmun lia ṭhena hmun khat aia tam chu an ban a ngai dawn.

McLaren hian hmun hrang hrangah hnathawktu 4,000 bawr vel an nei, heng zinga 1,200 bawr vel an ban dawn tihna a ni. Hripui leng vang hian bungrua hralh a har a, fakna (advertisement) aṭanga an sum hmuh tur ang an hmu ṭha thei lo bawk.

Hri leng vangin Formula 1 inelna ṭan theih a la ni lo a, bungraw siamna hmun khar a nih bakah siam chhuah zawrhna dawr khar a ni bawk. Coronavirus hian team dang pawh na takin a nghawng mek.

McLaren chairman Paul Walsh chuan, "Hnathawktu tih tlem mai loh chu tunah hian duhthlan tur dang kan nei lo. He hun harsa hi company tan chuan chona lian tak a ni a, tho chhuak leh tur leh ngelnghet taka sumdawnna kan kalpui theih nan ngaituahna hman a ngai," a ti.

Formula 1 huang bikah chuan an hnathawktu 800 zinga 70 vel an chan dawn nia ngaih a ni, team hlun leh ṭha tak ni mah se hripui leng a nasat em avangin an tan duhthlan tur dang a awm lo.

Team hlun - Mercedes, Ferrari leh Red Bull-te pawhin harsatna an tawk mek, heng team dangte hian hnathawktu ti tlem kher loa harsatna sutkian theih an inbeisei. Mahse, tun thleng chuan kawng dang an la hre thei rih lo a ni.