Lyon lakah Man City an mualpho Champions League-ah Pep a talbuai!

Raheem Sterling-a'n goal ruakah a pet goal lo a, Champions League mangchhiain Pep Guardiola a la kalsan lo. Inrinni zan khan Lisbon-ah UCL quarterfinal khelh a ni a, French club vantlang Lyon lakah Manchester City 3-1 in an tlawm.

Man City hneh loh Lyon hi Ligue 1-ah pasarihna a ni a, tun season Champions League-ah an champion a nih ngawt loh chuan season tharah Europe-ah an inlan dawn lo.

Football ngainatuten semi-final-a Manchester City leh Bayern Munich inkhelh hun an mitthla a, Lyon an thlir kan. Amaherawhchu football-ah thleng thei lo a awm lo a, Lyon-in thil harsa a thlentir.

Minute 24-na lekah Lyon zawkin goal an khung a, Maxwel Cornet-a'n City keeper Ederson-a khar loh hmunruak zimte chu hmu fuhin goal class zet a khung. Second leg a awm loh avangin Man City an chak lo thei tih a lang a, Lyon an talbuai lo.

Goal dang hmuh tur a awm lo, minute 69-naah Raheem Sterling-a pass chu Kevin De Bruyne-a'n a theihna pholan nan hmangin siphurh a sut. Man City an dinhmun a ṭha leh ta zawk a, chutihrualin Lyon manager Rudi Garcia-a'n minute 75-naah striker Moussa Dembele a luhtir a, chak an tum ngei tih a lang.

Celtic striker hlui Dembele-a'n minute 79-naah Houssam Aouar pass chu goal-ah a chantir a, Lyon striker hian City defender Aymeric Laporte pal thlu mah se VAR hmanga en let hnuah goal hi pawm a ni tho.

Man City-in siphurh sut theihna hun ṭha an nei a, Gabriel Jesus-a pass ṭha zet chu Raheem Sterling-a'n goal ruakah a pet over. Sterling-a'n a hlah zawh chiah hian Lyon-in goal an khung zui bawk. Minute 87-naah Aouar ball pet chu keeper Ederson-a'n dang per palhin Dembele-a'n chak nemnghehna goal khung nan a hmang.

Manchester City-in ball possession 72% zet an nei a, goal chance pawh vawi 18 an insiam. Amaherawhchu hun pawimawhah manager Pep-a chawpin an talbuai. Spanish manager hian ṭum dang ang lo takin tlarhnung laiah defender pathum a dah a, bench-ah attacking player Bernanrdo Silva, David Silva, Riyad Mahrez leh Phil Foden te an awm. Pep-a'n UCL nomawi a duh luatah pressure a insiamchawp nasa a, player-te khelh danah pawh a lang a tih theih.

Chutihrualin City-in an striker chhuanvawr Sergio Aguero chu hliam vangin an chhawr thei lo a, Lyon goal khung danah VAR-in a tih tur a ti tawk lo a, Raheem Sterling-a'n goal ruakah a khung lo bawk avangin an vanduai a tih theih bawk.

City boss Pep Guardiola chuan, "Chhuanlam siam ka tum lo. Minute 25 chhung kha kan khelh duh danin kan khel thei lo a, second half-ah erawh kan khel ṭha viau chuan ka hria. Chutihrualin UCL-ah chuan tihsual a thiang lo a, kan tihsual miau si avangin kan chak ta lo a ni. A pawi ka ti takzet," tiin a sawi.

UCL semifinal-ah Ligue 1 club pahnih PSG leh Lyon an lut a, French league hi Europe-a inelna sang panga zingah ngaihsan a hlawh tawk lo. Ligue 1 tih el nan hian 'Farmers League' tih an hmang ṭhin a, PSG-in tun hnaiah inelna an thunun nen an sawi fiamna hi awm lo hran lo.

Lyon-in Man City an hneh zawhah PSG star Kylian Mbappe chuan, 'Farmers League," tih twitter-ah a tarlang a, nuihza siamtu (joker) lem a dah tel bawk. Pep Guardiola team enkawl hnehtu Rudi Garcia pawhin a naute chu chak an phu zawk thu a sawi.

Lyon manager Garcia chuan, "Tactical battle-ah kan chak a, kan khelh dan turah kan chiang. Inkhelh laiin tlem han thlak mah ila kan buai phah lo," tiin a sawi. French club hian August 19, Nilaini zanah Barcelona sawptu Bayern Munich nen semifinal an khel ang.

Ligue 1 lamah Lyon hian beisei phak lo mah se tun hnaiah an khel ṭha, league champion PSG nen League Cup final an khelh ṭumin goal an venghim tluan thei a, Cristiano Ronaldo awmna Juventus an hneh ṭum pawhin tlarhnung phui chu an chakna hnar a ni - City lakah pawh fak an phu.