Guardiola dah sangtu Robben

Arjen Robben chuan Bayern Munich lama a thawhpui tawh Pep Guardiola a dah sang hle a, khawvela manager awm tawh zingah chuan Spanish pa hi a ṭha ber nia a hriat hial thu a sawi chhuak. 

Netherlands inter-national hlui hian nikum July thla khan football a chawlhsan thu a puang, player a nih lai khan Allianz Arena-ah Guardiola nen hian an thawkdun tawh a, season tinin Bundesliga nomawi an chawi.

Kum 36 mi Robben hian coach ṭha tak tak a lo hrawn tawh ṭhin. Bayern-ah pawh Louis van Gaal, Carlo Ancelotti, Jupp Heynckes leh Niko Kovac te a hrawn hman; Real Madrid leh Chelsea lamah hun a hmang tawh bawk.

Robben chuan, "Football hi ka hmangaih a, a bik takin attacking football chu ka ngaina zual. Pep khan goal venhim aiin a khung lampang kha a ngai pawimawh zawk a, inkhel thunun bakah mawi taka khelh chhuah a duh bawk a ni.

"A kaihhruaina hnuaiah khan kawng tam takin hma ka sawn, tun hma lama ka tih theih loh leh nih phak loh tur ang pawh ka nih phak phah. Munich-ah kum thum chhung kan awmdun lai khan kawng hrang hrangin hmasawnna ka nei a, ka ngaihdan chuan khawvela coach ṭha ber a ni," a ti.

Robben hian 2009 khan Spanish club lian Real Madrid aṭangin Bayern hi a zawm, German club lian tan hian nomawi 20 lai a chawi; heng zingah hian Champions League pawh a tel.

UCL an champion theih nan Robben hi player pawimawh a ni, league lama an elpui Borussia Dortmund nen Champions League nomawi an inchuh a, hun tawp dawnah Robben hian chakna goal a khung.