Gladbach leh Leverkusen an tawlhthlu

Bundesliga-in Champions League atan hmun pali an nei a, hmun ruak pali hi team pangain an inchuh. League hmahruaitu Bayern Munich dah bo pawhin Borussia Dortmund, RB Leipzig, Borussia M'gladbach leh Bayer Leverkusen te hi an la inhnaih hlawm hle. 

Khualmualah Borussia M'gladbach-in an khingpui Werder Bremen lakah goal khung thei loin point khat chauh an hlawh chhuak a, amaherawhchu Wolfsburg-in Bayer Leverkusen 4-1 a an sawp avangin palinaah an la awm chhunzawm. Gladbach leh Leverkusen hian point 53 ve ve an hmu a, Bundesliga-ah point inang a awm a nih chuan goal difference en hmasak a ni.

Inkhel entu an awm miau loh avangin home advantage a awm thei lo. Champions League khel tura point thum mamawh Bayer Leverkusen chu an mualah an chesual a, Wolfsburg lakah 4-1 ngawtin an tlawm.

Wolfsburg tan Marin Pongracic-a'n goal hnih a khung a, Maximilian Arnold leh Renato Steffen ten goal khat ve ve an khung hnuah Leverkusen tan Julian Baumgartlinger-a'n goal khat a khung ve hram. Thawhlehni zan Bundesliga inkhel paliah team pahnihin hnehna an chang a, hnehna chang Bayern Munich leh Wolsburg te hi khual khua ve veah hnehna an chang.

Covid-19 hnua inkhel hmasa pahnihah Leverkusen-in Werder Bremen leh Gladabch an sawp ve ve a, Kai Haivertz-a'n goal hnih ve ve a khung. Wolfsburg nen erawh German rawlthar duhawm Kai Havertz aiin Wolfsburg midfielder Maximilian Arnold a langsar ta zawk.

Borussia Moncheng-ladbach-in Covid-19 vanga inkhelh chawlh hnuah Eintracht Frankfurt 3-1 a hnehin bul an ṭan a, amaherawhchu 3-1 bawka Leverkusen an hneh loh avangin an dinhmun a phet. Thawhlehni zan khan Gladbach-in relegation zone-a awm Werder Bremen an tlawh a, point an hlawh chhuak lo. 

Werder Bremen-in twitter-ah 'Team ṭha tak lakah point kan hlawh chhuak," tiin an ziak a, heta ṭanga teh pawh hian Gladbach-in point hnih an hloh tiin a sawi theih. Gladbach hian May 31, Pathianni zan hian Union Berlin an mikhual dawn a, chetsual a thiang tawh lo ang.