
City vs Liverpool - Ennawm ropui kan hmaah!

Tunlai khawvela football hmuh-nawmna pho chhuak ṭhin coach thlang chhuak dawn ila, Pep Guardiola leh Jurgen Klopp tel lo chuan a kim lo ang - Romeo & Juliet tel loa hmangaih thawnthu ngaihnawm thlan ang chauh a ni ang.
Chutiang taka football mawina leh ropuina pho chhuak ṭhin coach pahnih chu zanin hian an intawng leh dawn ta a, team pahnih intawn hun tur hi zan dar 6:00 a nih avangin chaw ei kham, ṭhut nuam tawk lai vel a ni dawn!
Season hmasa khan team pahnih hi inel leh viau tura ngaih an ni a, mahse, kawng lakah Reds-in harsatna an tawk a, Champions League pawh an khelh phak zui loh laiin City erawh treble champion an ni thung - an elpuiin an chhuk nuih vel hi Reds tan a na.
Tun season-ah Liverpool an insiamṭha a, Premier League champion tura City elpui ber ang hiala sawi an ni leh ta. Premier League match 12 khelh tawhah team pahnih hi point hnih chauhin an inthlau a, zanina chak zawkin English football top division-ah hma an hruai dawn.
Haaland a dam
Norway-in friendly match-a Faroe Islands an hneh ṭumin Erling Haaland a inhliam a, City striker hi Euro 2024 qualifier-a Scotland nen an inkhel aṭangin a inhnukdawk hial - City fan-ten an striker dinhmun hlauthawngin an thlir.
Mahse, Haaland dinhmun a ngaihtuahawm lo a, Norwegian striker hian training a zawm leh tawh. Chuti a nih chuan zaninah pawh a inlan ngeiin a rinawm a, tlarhnung lama Reds player-ten Haaland dah 'nil' dan tur an ngaihtuah a ṭul.
Haaland hian tun season Premier League-ah goal 13 a khung tling leh der tawh a, Liverpool lakah a goal khung zat tihpun a châk dawn. Mahse, Reds hian tlarhnungah Virgil Van Dijk hoin Haaland dah ṭhat an tum dawn a, hei hi hmuh a châkawm.
Liverpool tan Ibrahima Konate-a'n training a zawm leh tawh a, Joel Matip nen VVD kawp turin an inel ang. Andy Robertson inhliam chu Liverpool tan buaina la ni reng a, Kostas Tsimikas chu a hmun ruak turin a awm.
Indona chu
Coach pahnihin fimkhur taka inven ai chuan in nawr an thlang leh ngei ang tih a rinawm a, hei hi hmuh châkawm chu a ni - Reds-in tlarhmaah goal nawr turin Mohamed Salah an la nei reng a, Egyptian forward hian tun season-ah league goal 10 a khung leh der tawh.
Liverpool hausakna chu tlarhma hi a ni a, Salah 'form' loh pawha mawhphurhna la turin Diogo Jota, Luis Diaz, Darwin Nunez leh Cody Gakpo an la nei cheu a, hei bak bak a awm chuang lo tih theih ṭhiau an ni - City tlarhnung tan fimkhur a finthlak dawn.
Chutihrual chuan City hian Haaland bakah Julian Alvarez, Phil Foden, Jack Grealish leh Bernardo Silva an nei ve tho a, Silva erawh hliam dam kawr Rodri puiin goal nawr ai mahin tlarhnung venpuiah a thawh a rinawm zawk.
City hian hliam vangin Kevin de Bruyne, John Stones leh Mateo Kovacic te chu player langsar an chhawr theih loh tur an ni a, Liverpool erawh Alexis Mac Allister leh Dominik Szoboszlai te ho nen an inlan thei dawn a, an inringtawk khawp ang.
A chianna
City tan goalkeeper chhuanvawr Ederson inlan dawn leh dawn loh a la chiang lo a, he thu buatsaih a nih laia City training hnuhnung ber thlalakah Brazilian keeper hi hmuh tur a awm lo.
Ederson hi goalkeeper a ni satliah lo a, hnung lam aṭanga City game siam nana player pawimawh a ni. Brazil international tel loin City an pan sawt ang tih a chiang a, Liverpool fans tan chuan lawm taka kut ben hnan a châkawm ber ang.
Season hmasaa team pahnih an intawn hnuhnung zawkah Manchester City-in 4-1 ngawtin hnehna an lo chang a, zak takin Liverpool an haw - tunah an mualphona hliahkhuh turin hun ṭha an tan a her chhuak a, bawhpelh a thiang lo.
Reds tan Etihad Stadium-a City hneh hi, "Champion turin kan inpeih leh ta e" tihna tluk a ni dawn a, City tan English football an thunun a ni, tih nemnghehna remchang a ni bawk - 'a hmuhnawm dawn' tih aia a hmuhnawm turzia sawi theihna ṭawngkam a awm em?
Panna lai
Manchester City-in tun season Premier League match 12 aṭangin goal 32 an khung tawh a, a khung hnem ber an ni - mahse, City fan-te tan hlauhthawn tur pakhat a awm a, an league match hnuhnung berah Chelsea nen 4-4 in an inhnehtawk.
Stamford Bridge-a goal lut zat hi en vang vang ila, City-in goal an khung theih rualin, a chhuah lam pawh an lo tithei tho tih a lang a, Liverpool-in Chelsea nena an inkhel kha inzir nan an hmang a nih pawhin a awm lo hran lo ang.
Chutihrual chuan Liverpool hi inchhuang lutuk tur an awm bik lo. Jurgen Klopp-a'n tun thlengin number 6 nghet a la nei lo a, Mac Allister bawk hi a rin leh chuan Argentine midfielder hi a nem mah mah lo ang tih a sawi theih lo a, hei hi City-in an chhawr ṭangkai thei.
Trent Alexander-Arnold hi right back ṭha tak a nih rualin a defending ṭhat tawk lohna min entir leh ta zauh zauh a, English defender tan City lakah fimkhur a ṭul a, vawi khat chetsuala hrem nghal thei team an tum dawn avangin fimkhur a ṭul ang.