Venghnuaiin Project Veng an hneh thei ang em?

Vawiin tlai dar 2:00 hian Zote Toyota MPL10-ah FC Venghnuaiin Project Veng FC an hmachhawn dawn. An inhmachhawn hmasak ṭum kha Kolasib a ni a, Project Veng hi 2-1 in an chak. Tun ṭuma an inkhelhna tur chu RG Stadium, Mualpui a ni a, Venghnuai aṭangin kea kal phak lek a ni.

Venghnuai hian Kolasib-a Project Veng an hneh loh avangin MPL10-a chak la nei lo awmchhun an ni a, chak an mamawh tawh hle. Match hnuhnung berah Venghnuai hi Chawnpui FC nen an inhnehtawk a, referee thutluknaah club hruaitute an lawm lo.

Mahse, replay en letin referee thutlukna hmasa a dik. Referee hian ball-in Venghnuai midfielder Eric Remruatpuia Chhangte kut a per avangin penalty spot a kawk a, assistant referee nen an inrawn hnuah Chawnpui player kutin ball a per hmasaah ngaiin penalty thutlukna a sut.

Referee-in thutlukna a sut nachungin Venghnuai hruaitu an lungawi lo hle a, referee-in Chawnpui a duhsakah an ngai. Venghnuai hruaitu zinga pakhat chuan an lungawi loh thu a sawi bakah RG Stadium-a inkhelh hunah entu an tam tur thu a sawi a, Project Veng an hmachhawn hunah entu an ṭhahnem thei ang em tih chu hunin a hril ang.

Venghnuai hian Project Veng hi hneh let ngei an tum a, point thum an hmu thei a nih chuan table mawngphah an chhuahsan thei ang. Chutihrualin Project Veng lamin an tha an la thlah bik lo a, match hnuhnung berah table chung bera awm Chanmari FC an chelh.

Kolasib club hi head coach R. Lalrammawia'n (Patea) Mizo naupang India sub junior tana trial tur a hruai vangin a awm dawn lo a, Patea awm loh chhungin Lalruatfela'n mawhphurhna a la ang. Chanmari laka point an hlawh chhuah ṭumin Ruatfela hoin an khel tawh a, inrintawkna nasa tak nen Venghnuai an hmachhawn ang.

Team pahnih hian chawlh an hman ṭhat avangin an fitness a ṭha a, player neih danah an intluk tawk. A hmuhnawm lai tur chu chak tumin an khel ve ve dawn a, inkhel a nung ṭha khawp ang.