Chhinga Veng an phur, a dal theitu Electric Veng

Zote Toyota MPL10-ah Chhinga Vengin vawiin chhun dar 12:00 hian RG Stadium-ah Electric Veng an hmachhawn dawn. Coach Lalsangzuala Hmar enkawl Chhingcows-in phase 2-ah harhtharna an chang a, match hnih an chak zawn avangin a sang pali zingah an tel tawh.

Season liam taa Chawnpui FC champion puitu Sanga hian Chhinga Veng hi nomawi chawipui leh ngei a tum a, Project Veng an hneh hnuah I League club Aizawl FC an hneh avangin champion turin an ṭha tawk tih a lang.

Chutihrualin vawiina an khingpui tur Electric Veng hi Kolasib-ah khan hun tawp dawn hnaihah Ephraim Lalremtluanga freekick hmangin 1-0 in an hneh hram a, inchhuang thei an ni lo. Khami ṭuma hnawhchhuah CVFC midfielder Johny Lalremruata leh EFC captain C. Lalhriatpuia te match hnih hrem an nih hnuah match hnuhnung berah an kir leh tawh.

Johny hian match hnuhnung berah Aizawl FC lakah chakna goal a tauh lut a, C. Hriata pawh Mizoram Police tlarhnung tan a hnawksak hle. Player pahnih vawiin inkhelah en bik a sual lo ang. Electric Veng hian point thum an hlawhchhuah chuan semifinal beiseina an nei thar a, hei vang hian Chhingcows semifinal beiseina daltu nih an tum ber a ni ang.