MPL hmahruaitu thar Mizoram Police

Lalbiaksanga Colney kaihhruai Mizoram Police chuan nimin khan Chawnpui FC 2-1 in an hneh a, Zote Toyota MPL10 hmahruaitu an ni. Police tan player talent nei ṭha bik Malsawmfela leh R. Malsawmtluanga ten goal an khung a, goalkeeper F. Lalmuanawma ten goal venhim hna thawk ṭha bawkin point thum hlu tak an hlawh chhuak.

Sawmfela leh Msa

Mizoram football-ah player thar an rawn chhuak a, chutihrualin a thiamsa Sawmfela leh Msa ten an thiam an la theihnghilh lo. Nimin inkhelah pawh player tawnhriat nei ṭha pahnih hi Police chak nan an pawimawh.

Police-in Electric Veng an hneh ṭuma bench aṭanga danglamna rawn thlentu Sawmfela'n inkhel bul a rawn ṭan a, a len vang ringawt loin a thiam vangin a langsar. Sawmfela hian minute hnihna lekah box pawnah ball a la thla a, Chawnpui player-ten an veng hneh lo - box pawn aṭangin ṭha zetin a pet goal.

Sawmfela hi a hmuhnawm chhunzawm a, Lalbiakhlua tana a ball ṭha pe tura amah vengtu a paihsawn dan chu kum naupang zawkte tana inzirna tham a tling a, Chawnpui tlarhnung tan a hnawksak hle.

Chawnpuiin minute 11-naah siphurh an sut lehnghal a, Police keeper Muanawma'n a hna thawk ṭha tawk lo. Republic Veng tlangval Lalruafela'n (RF-a) box chhungah zuang chungin net puar pawpin siphurh sutna goal a khung.

Lalrindika Hmar hote insiamrem chho mah se minute 30-naah tlarhnung an muthlu zeuh a, talent nei ṭha bik MS-a a rawn lang. Police midfielder MS-a hian box pawn aṭangin goal kilah a dah a, Chawnpui keeper John Lalruatfela a rep nalh hle.

Bang rinawm Muanawma

Chawnpui FC-in second half-ah na takin an nawr a, Lalhmunmawia (Ahmuntea) awm lohna Police tlarhnung a nghing hle. Chawnpui player-in chance ṭha an inhlahsiak a ni ber a, chung zingah chuan K. Lalrosanga'n goal ruaka a khung loh chu a langsar ber. Chutihrualin David Laltlansanga goal khung tur pawh goalline aṭangin B. Zoramthanga'n a tauh chhuak hman a, Tea Chinzah pawin chance ṭha a nei mah se Police keeper Muanawma a paltlang thei lo.

Police-in player che rang zawk an luhtir hnuah Chawnpui goal bawh a na ta lo a, mahse hun tawp dawn ṭepah Rindika Hmar hoten chakna goal khung theihna remchang an nei tho. Substitute Malsawmzela'n (Valpuia) buai karah ṭha takin goal-ah pet mah se Muanawma'n a dang hman. Police 2-1 in an chak a, Chawnpui tan erawh MPL10-a an chak lohna hmasa ber a ni.