WBC Asia title chuh tur Dinga

Mizo boxer Laldingliana chuan WBC Asia super bantamweight champion nih tumin Bangkok a pan a, vawiin chawhnu lam hian Thai number 1 leh champion lai ni bawk Thattana Luangphon nen an inhnek dawn.

Suamlum Night Bazaar, Ratchadaphisek-ah Thailand rama vawiin chawhnu dar 1:30-ah inhnek an ṭan dawn. Inhnek pahnihnaah Dinga leh Thattana an innuai dawn a, chawhnu dar 2:00 emaw aia hma hretah emaw pawh inhnek ṭan thei an ni a, rokhawlhna lian tak a awm thut loh chuan LPS 1-ah live-a pek chhuah a ni ang.

Nimin khan round 10 inhnek turin an inbuk a, kum 26 mi Thattana'n champion kawnghren keng chhuakin a vawi 10 nan Dinga hmaah humhim a tum a, khawtual mi a nih avangin thlawptu mipui a nei ṭha a, hmachhawn a awlsam lo ang.

Kum 24 mi Dinga tan boxing a khelh chhunga inhnek lian leh pawimawh ber a ni dawn. November 10 khan LPS Arena, Aizawlah WBC India bantamweight title lain round khatnaah Pradish A a hneh a, ni 14 hnuah Thailand-ah a inhnek leh nghal dawn a ni.

Tuipui tlangval hi professional huanga vawi nga inhnek tawhin a la chak vek a, mi pali knockout-in hnuhma nei chhe lo mah se Thattana nena khaikhinin an tawn hriat a inthlau a, boxrec rating-ah 706-na a nih laiin Thai boxer erawh 69-na a ni.