Magpies mikhual tur Chelsea

Chelsea season hman ṭhat loh thu kan sawi ṭhin a, chutihrual chuan Newscalte United chet ṭhat thu hriat tur a awm ṭhin bawk - club pahnih hi zanin dar 8:30 hian St James' Park-ah an intawng dawn.

Blues hi an chak a nih chuan Magpies nen an inthlauhna chu point khat lek a ni dawn! An chet chhiat lai pawhin Newcastle che ṭha chu an hlat vak lo tihna a ni a, chutihrualin an chak lo a nih ngat chuan Mauricio Pochettino naute tan hmabak a hautak zual ngei ang.

Chelsea hi an indinthar mek a, an nghet sawt hle. Tottenham an hneh hnuin Manchester City nen tun season Premier League inkhel tawha hmuhnawm ber ang hiala chhal ngam an chhawp chhuak thei a nih kha, international break hman zawh hnu hian chhawm zel thei tak ang maw!

London club tana chanchin lawmawm tak chu Christopher Nkunku a dam tawh a, training a zawm tawh - chutihrualin Magpies muala inlan tur chuan atan a la hma deuh mai thei a, coach Poch-a'n a duh a nih erawh chuan inkhel thei tawh tura ngaih a ni.

Nkunku a la inkhel lo a nih pawhin Nicolas Jackson a dam a, forward tawnhriat nei ṭha Raheem Sterling bakah Man City aṭanga an lak thar Cole Palmer an la nei bawk. Palmer hi kum 21 mi chauh la ni mah se inkhel boruak sang a zo hle, zainah pawh en bik zinga mi a ni ang.

Eddie Howe enkawl Newcastle United hian player mala langsar fal tak an nei hran lo, mahse team inkhairual leh thawhhona ṭha tak nei an nih avangin hmachhawn an harsa a, team lian hneh turin theihna an nei tih ka hmu fo tawh.

England squad aṭanga inhnukdawk Kieran Trippier chu a inlan theih a beisei awm tawh a, ani hi tlarhnunga an hotu pawimawh a nih tel avangin a tel hian an team an danglam. Hliam nei dang Alexander Isak leh Miguel Almiron te pawh inlan thei tawh tura beisei an ni a, tlarhma lam an hlauhawm sawt ang.