Indian Super League - a lo let leh ta!

International break neih a nih hnuah Indian Super League chu zanin dar 5:30 aṭang hian khelh ṭan a ni leh dawn ta a, Mizo player nei lo Chennaiyin FC chuan East Bengal an mikhual ang - Kolkata club hian defender rinrawl Lalchungnunga leh midfielder Vanlalpeka Guite an kawl mek.

Team pahnih hi insiamṭhat mamawh ve ve an ni - Spanish coach Carles Cuadrat hoin East Bengal-in beiseina nei sang viau mah se, team 12 inelnaah 10-na an ni mek a, match nga khelh tawhah vawi khat chiah an la chak!

Chennaiyin an ropui lua bik lo. Match ruk an khelh tawhah vawi hnih chakin, vawi li an tlawm a, team pahnihin point thum hlawhchhuah theihna turah ve ve an inngai dawn a, inkhel a hmuhnawm ang.

Zanin dar 8:00-ah hian Kerala Blasters chuan Hyderabad FC an mikhual dawn bawk. Blasters hian match ruk khelh tawhah vawi li hnehna changin, vawi khat chiah an la tlawm a, Mizo midfielder Freddy Lallawmawma an kawl bawk.

ISL match ruk an khelha match ngaa inlan Freddy hi international break laiin lirtheiah a chesual a, zaninah a inlan aiin a inlan loh a rinawm zawk - Hyderabad-in midfielder Mark Zothanpuia, Lalchhanhima Sailo leh forward Ramhlunchhunga an kawl a, Mark hian match thum khel tawhin Chhantea leh Chhunga te chance pek an la ni lo.

Thangboi Singto enkawl Hyderabad hian tun season-ah chak an la nei lo a, vawi thum draw an nei tawh thung - tun season-a a vawi khat nan chak an duh dawn a, Blasters lakah an tih theih chuan an lawm a zual ang.

Pathianni zan dar 8:00-ah inkhel pakhat a awm dawn a, midfielder Fredy Chawngthansanga leh forward Rochharzela te kawltu NorthEast United chuan Bengaluru an mikhual ang - Bangalore club hian midfielder Lalremtluanga Fanai an kawl.

Highlander hian match ruk khelh tawhah vawi hnih hnehna an chang ve tawh a, vawi khat chiah la chak Bengaluru aiin point thumin an sang zawk. Team pahnih an incho tawk ang tih a chiang a, Pathianni zan inkhel en tichâkawm zualtu a ni.