SKY-a'n India chakpui

India-in Cricket World Cup-a an hneh loh Australia chu November 23, Ningani zan khan T20 match-ah an hmachhawn a, Suryakumar Yadavi-a captain-na hnuaiah wicket hnihin an hneh. T20 series hi match nga khelh tur a ni a, match hnihna hi November 26, Pathianni hian Greenfield Stadium, Thiruvananthapuram-ah khelh leh a ni ang.

Visakhapatnam-a inkhelah India captain SKY-a'n vawm hmasak a thlang. Aussies tan opener Steve Smith (54) leh Josh Inglis (110) te an che ṭha a, over 20-ah 208/3 runs an siam. Inglis hian century a siam ringawt lo a, 110 runs vaw chhuak turin ball 50 chauh a mamawh.

India opener Ruturaj Gaikwad-a'n ball khat pawh a hmachhawn hmain a run out a, opener Yashasvi Jaiswal-a'n 21 runs chauh a siam bawk. Mahse, Ishan Kishan-a'n 58 runs a siam bakah SKY-a'n ball 42 lekah 82 runs a rawn siam.

India tana T20 captain nichunga match hmasa berah SKY hi run siam tam ber a ni a, KL Rahul (62 runs) leh Shikhar Dhawan (46) te record a rawn khum. Aussies target a san avangin India hi awlsam takin an chak lo.

Over tawp berah 7 runs siam a la ngai a, Rinku Singh-a'n 4 runs hlap nghal mah se over tawp berah hian Axar Patel, Ravi Bishnoi leh Arshdeep Singth te an thi. Ball tawp berah run khat an la mamawh a, Rinku hian six runs a vaw chhuak. Mahse, no ball a nih avangin an mamawh run khat an hmu tho a, ball khat dah bangin India-in hnehna an chang.

Captain SKY chu man of the match-a thlan a ni a, T20 match 54-ah vawi 13 zet man of the match-ah thlan a ni tawh. Match 115-a man of the match vawi 15 ni thei Virat Kohli record a hnaih ta hle.