Barca-in Gavi thlaktu tur an nei?
International break a zo a, he 'chawlh' hi Barca tan chuan lungngaihna thlentu a ni - midfielder pawimawh leh ṭhangduang Gavi chu hliam nei chungin a haw a, a tuartu langsar chu Spain ni loin hlawh petu Barcelona an ni.
Euro 2024 qualifier-a an match hnuhnung berah Gavi hian Spain tan jersey hain, Georgia a hmachhawn a, mahse, minute 26 lek khelmualah hun a hmang hman chauh tihin lakchhuah a ṭul a, a khupah hliam a tuar.
Gavi hliam hi Barcelona chuan an en dik vat a, a chawlh chen tur chiang taka puanzar la awm lo mah se ACL a nih avangin a chawl rei dawn tih a chiang - tun season-ah Gavi hi kan hmu leh kher tawh lo mai thei.
Tichuan...
Barca hian thlasik transfer-ah Gavi thlaktu tur an la dawn nia sawi a ni a, mahse, tun hnai khan club sporting director Deco chuan Gavi thlaktu tur an zawn loh thu leh, an player chu thlak theih a nih loh thu a sawi.
Deco chuan, "Gavi thlak hi thil theih a ni lo. A thiamna leh rilru puthmang ang pu player hi tunah lei tur an awm rih lo," a ti a, Barca chuan Gavi tel loa season hmachhawn an tum zawk tur thu a sawi chhuak.
Barca president Joan Laporta pawhin Deco leh coach Xavi thutluknaah an innghah thu sawiin, "Squad chhah ṭha tak kan nei sa a, Xavi hian season duhawm tak hman chhunzawmna tur hmanrua chu a nei ṭha sa - he thila thutlukna siam tur hi chuan Sporting Director leh Coach chungah kan rinna kan nghat sa," a ti.
Gavi aiah Vitor
Hetihrual hian Barca hian Gavi a inhliam ta rau rau a nih chuan, hei hi remchangah lain nipui laia an lei tawh, season thara an club zawm chauh tura an tih forward Vitor Roque chu January-a lakluh law law an tum dawn niin Spanish media-te chuan an tarlang.
Athletico Paranaense forward-in Barca tana contract a ziah hnua, Brazilian club-a a la khelh chhan hi Catalan club sum dinhmun vang a ni. Mahse, Gavi a inhliam tak avangin Barca-in player hlawha sum an sen theih zat a awm belh a, Gavi hlawh 80% pel lo hlawh player an la lut thei.
La Liga lam pawhin Barca hi January-a Vitor Roque la lut turin phalna an pe tawh nia sawi a ni a, Barca-in thlasikah hmel thar an nei lo ang tih a sawi theih loh.
Hmabak
La Liga champion lai Barcelona hi zanin dar 6:30-ah league match khel turin an inlan dawn a, khualmualah Rayo Vallecano an lenchilh ang - Catalan club hian league match 13 khelh tawhah point 30 neiin pathumna dinhmun an luah mek.
La Liga-ah hian rin loh taka hmahruaitu ni mektu chu Girona an ni a, tun season-ah vawi khat chiah an la tlawm - anni hian Barca aiin point li ngawtin an hmu tam a, pahnihna Real Madrid aiin point hnihin an sang zawk.
Real hian Pathianni zan dar 11:00-ah Cadiz chu khualmualah an lenchilh dawn a, palina Atletico Madrid chuan zanin dar 1:30-ah Real Mallorca an mikhual ang.