Alonso chhuah theihna dan a awm lo - Leverkusen CEO

Bundesliga hmahruai mektu Bayer Leverkusen CEO Fernando Carro chuan tun hnaia European club lian tam takte chil tiputtu an coach Xabi Alonso chungchang a sawi chhuak a, Spanish coach chuan a contract-ah release clause a neih loh thu a sawi.

Kum 41 mi Alonso hian a vanglaiin Liverpool, Real Madrid leh Bayern Munich tan hming a chher viau a, heng a club hlui zinga a tu emaw ber hian an coach tura an sawm a nih chuan a chhuah theihna dan a contract-ah a ziak tel niin khawthlang media ṭhenkhat chuan an tarlang.

Mahse, Carro chuan, "Alonso tan release clause maw? Ni lo e, chutiang kan mamawh lo. Ani nena kan inkar hi a ṭha em em a, he club hi kan hmachhawpahte kan ti tak tak tih a hre bawk. Tumah hian he club-a cham tura nawr luih kan duh lo a, nuam ti takin awm se, kan hnena cham zel hi duh se kan duh ber," a ti a, tihluihnaa coach chelh an tum loh thu a sawi.

Alonso hian October 2022 aṭang khan Bayer Leverkusen hi a enkawl ṭan a, hna a thawk ṭha hle. Tun season Bundesliga-ah match 11 khel tawhin tlawm an la nei lo a, vawi 10 hnehna changin vawi khat draw an nei.

Leverkusen hi zanin dar 8:00-ah league match khel turin an inlan dawn a, khualmualah Werder Bremen an lenchilh ang - nizan dar 1:00 khan Leverkusen aia point hniha hniam Bayern Munich an inlan a, FC Cologne an lenchilh. He thu buatsaih a nih lai hian result kan hre hman lo.

German club langsar zinga mi Borussia Dortmund chu zanin dar 8:00-ah vek an inlan dawn a, table-a pangana Dortmund hian Bayern leh Leverkusen el an duh chuan Borussia Monchengladbach lakah hnehna chan an zir a ṭul ang.