Beisei phak lo ennawm - City 1-1 Liverpool

Manchester City leh Liverpool inkhel tur a nih tawh chuan football ngainatuten nghakhlel taka thlirin, an ring an lo fan awk awk ṭhin a, mahse, Inrinni zana team pahnih intawnna inkhel erawh beisei angin a hmuhnawm tawk lo.

City tan ṭum dang ang bawkin Erling Haaland chuan goal hmahruai a khung a, minute 27-naa Norwegian striker-in goal a khung lai khan thinlunga zawhna chu, "Eng zat tak khung ang maw?" tih a ni daih.

Etihad Stadium-ah Liverpool an beh miau avangin Jurgen Klopp-a naute an 'comeback' beiseina a chau a, mahse, a tawpah Trent Alexander-Arnold a inlar - sawisel hlawh right back hian mawi lutukin si phurh sutna goal a khung a, 1-1 a ni.

Inkhel tawp thlengin goal dang a lut tawh lo a, team pahnihin point an insem. City leh Liverpool inhnehtawk laia hnehna chang Arsenal chuan table chung ber an luah a, City leh Reds in an dawt.

Haaland a dam

International break-ah City player ṭhenkhatin hliam tenau an nei a, hei vang hian ram tan ṭhenkhat chuan match pawh an khel lo - hliam nei anga sawi zingah Erling Haaland, Ederson leh Rodri te chu Liverpool hmachhawn turin an dam hman!

Pep Guardiola-a'n fing takin international break-ah ruahmanna a siam niin a lang a, dem theih erawh a ni lo. Minute 27-naah Norway tana a fehchhuahna lama inhliam Haaland a inlar nghal a, Alisson-a ball petchhuah sual zar zoin, chiang zetin goal hmahruai a khung.

Kum 23 mi Haaland tan Premier League-a a goal 50-na chiah a ni a, English top flight league-a heti zat goal khung tur hian match 48 bak a mamawh lo - Premier League-a goal 50 khung tling tura match mamawh tlem ber a ni.

Liverpool an bet a, City-in an nawr nat bawk si avangin chak lo tura City dah an harsa a, Jurgen Klopp-a nauten si phurh an sut ang em, tih ai chuan, "Engtikah nge City-in an khung belh ang?" tih chu zawhna a ni zawk.

Mahse maw...

Football ropuina chu rin anga thil a kal vek kher lo hi a ni. Hun tawp nan minute 10 chiah a awm tawh tihah Alexander Arnold a inlar a, English defender hian ball pet thiam bik a nihzia pholangin si phurh sutna goal a khung.

Arnold hian City fans lam hawiin a goal khung a lawm a, a hmui bula a kut dahin, Manchester khaw club ṭantute chu ngawi turin a hriattir - City fans an ngawi a, Reds ṭantute an sapatal thung.

Team pahnihin hun tawp thlengin goal dang erawh an khung tawh lo a, 1-1 in an ṭin - minute 90 chhunga team pahnih khelh dan thlirin Liverpool chu vannei zawk tia chhal theih an ni a, Etihad-a inkhel an nih bawk avangin draw result-a lawm zawk an ni.

Thawhlehni zanah Manchester City hian Champions League match khel turin RB Leipzig an mikhual zui dawn a, league-ah Tottenham Hotspur-in an lo hmuak zui ang. Liverpool hian Ningani zanah LASK nen Europa League match an khel thung ang.

A 'hot'

Ṭum danga team pahnih innawr tawn hmuhnawm tak kha hmuh tur awm lo mah se, football ngainatu tan chuan mit a tlai phak tho a, inkhel boruak a 'hot' loh phah lo. City hian Ruben Dias hmangin an goal hnihna an khungah an inngai a, mahse, goal luhna kawngah Manuel Akanji chu Reds keeper Alisson lakah a foul a, Dias goal khung hi pawmsak a ni ta lo.

City tan Jeremy Doku a hmuhnawm takzet a, kum 21 mi Belgian winger hian Alexander Arnold a sawisa a ni ber a, English right back hian a chelh meuh lo - mahse, a tawpah Arnold-a'n mawi zetin si phurh sutna goal a khung a, a hming chhe tur a thai reh.

Pep-a team tan Nathan Ake a khel ṭha takzet a, a hna ber atana an pek Mohamed Salah dah ṭhat kawngah a thawhhlawk. Chutihrual chuan Salah ang meuh player dah 'nil' ṭhak chu thil harsa a ni a, Egyptian forward hian goal khung lo mah se Arnold-a goal khung chu a siamsak a ni.

Inkhel tawp lamah Reds striker Darwin Nunez leh Pep Guardiola te chu khelmual pawn lamah an inhnial thinrim a, mahse, buaina pawi thui tak erawh a thleng zui lo niin a lang.

"Khel ṭha ila chu hnehna kan chang ang chu. He hmun hi inkhelh harsatna hmun an ni a, mahni muala a zawna rei tak an chak tawh pawh thil awm tak a ni a, team ṭha chungchuang an ni. Tih ṭhat chang kan nei a, khatiangah khan chance pawh kan siam ve leh mial ṭhin. Mahse, duh angin kan siam tam tawk lo a, kha aia ṭhaa khel thei kan ni a, chutiang tur chuan theihtawp kan chhuah zel bawk ang. Vawiin atan erawh tawnhriat ṭha tak a ni e."
- Jurgen Klopp, Liverpool manager

"Kan khel ṭha takzet a, kum riat hnuah pawh hetianga kan la khel reng thei hi chu inchhuang ve tak ka ni. Team ṭha tak lakah chuan kil tinah khelh ṭhat a ṭul ṭhin a, chutiang tak chuan kan ti bawk. A tawpa ball inpek kan tifuh tawk lo ṭhin a ni mai thei a, mahse, Liverpool khan an tlarhnung an veng ṭha em a ni. Liverpool-te angin kan target-a vawi hnih chiah 'shot' an neih chuan hna kan thawk ṭha tawk tihna a ni mai."
- Pep Guardiola, City manager