A chung berah Arsenal

Thlasik a inṭan a, season hmasa ang bawkin Premier League hmahruaitu chu a ngai - Arsenal bawk an ni leh ta. Mikel Arteta naute hian an hmahruaina hi nakkum nipui lai thleng an vawng him thei ang em tih chu zawhna lian tak a ni leh ta.

Hun tawp dawngah substitute Kai Havertz-a'n goal awmchhun a khung a, he goal hi Brentford mualah Arsenal 1-0 a an chak theih nan a tawk a, point thum hmuin EPL table chung berah an lawn theih phah, an elpui Manchester City leh Liverpool te inhnehtawk vang a ni bawk.

Loan hmanga hawh David Raya-a'n Brentford a hmachhawn thei lo a, kumin September thla hnua a vawi khat nan Aaron Ramsdale chuan EPL-ah inkhel bul a ṭan a, a ball pek chhuah sual vangin an lamah goal a lut teuh hle.

Mahse, Ramsdale tihsual khuh turin Declan Rice a lo ding hman hlauh - England international midfielder hian a ṭhianpa mualpho tur a hliahkhuh, hamrik hnuhnung ber a rik hnua English player pahnih inkuah vawng vawng khan an boruak tur chu a hril thui viau.

Arteta-a'n manager a nih hnuah match 200 a thlen ṭum hian inkhel an thunun a, mahse goal erawh an sual chhuak thei mai bik lo, point khatah an lungawi a ngai dawn ni pawhin a lang hman a, hun ṭha bawhpelh thei dinhmunah an ding hman.

Amaherawhchu, forward ṭha Bukayo Saka-a'n a thiam dan takin a hlauhawm laiah ball a vawrh lut a, hnai takah Havertz chuan a lo tauh lut. Pound maktaduai 65 man forward hian sawisel hlawh ṭhin mah se goal hlu bik a khung.

Arsenal manager Arteta chuan, "Thlasik a ni tawh a, hmun vawt tak Brentford tlawh a hnehna chan hi thil awlsam a ni lo. Inkhelh harsatna hmunah hnehna chan phu tak chungin kan khel tluan thei, kan khelh dan khan min ti lawm hle," a ti.

Spanish manager hian Havertz a lawmpui thu a sawi bawk a, "Thil hi awlsam taka neih a nih chuan a hlu tawk lo ṭhin. Kai-a pawh khan a hlut zual hle tih ka hria, amah chauh ni loin a ṭhiante leh mipui zawng zawng pawhin an lawmpui," tiin a sawi.

North London club hian Nilaini zanah Champions League khel turin Lens an mikhual dawn a, kar tawpah league match khel turin Wolves chu Emirates Stadium-ah an mikhual chhunzawm leh ang.