Marquez leh a nau Alex an phur tawh

MotoGP season an la ṭan thei lo a, world champion Marc Marquez leh a nau Alex te chuan Thawhlehni khan Honda bike khalh chungin training an nei 

ṭan a, an phurin beiseina pawh an nei sang hle.

Honda hian Spanish rider Marquez an neih fuhzia an hrechiang a, season hmasa Moto2 world champion Alex an lalut pawh hi a mak lo; Spanish unau hian Honda tan phurna nasa tak an siamsak rualin rider pahnih tan pawh team ṭha an nih ngei a rinawm.

Marquez chuan, "Thla hnih hnuah training kan nei thei ve leh chauh a ni a, a nihna takah chuan tlankawnga han chet vel chu rilru a hlauthawng deuh, rilru leh taksa a la inpeih famkim lo deuh a ni," a ti.

Kum 27 mi chauh la ni mah se bike intlansiakna sang berah Marquez hi vawi ruk a champion der tawh, record ropui leh sang zawng zawng chu a rawn khum chho deuh zel, season thar lo awm turah pawh champion tura rinkai ber a ni leh ang.

Honda team hotupa Santi Hernandez chuan, "Chawlh chhungin harsatna hrang hrang kan tawk ve a, hmasawnna kan neih theih nan ruahmanna pawh kan siam. Enchhina hrang hrang kan neihte la hlawhtling vek lo mah se beiseina kan nei sang," a ti. Honda rider thar Alex pawhin taksa sawizawi reng ringawt loin a taka bike an khalh thei ta chu a lawm thu a sawi ve bawk.

MotoGP hi an beisei dan chuan July thla chawhnu lamah an tlan ṭan ang. Spain sorkar chuan an ramah tlan phalna a pe tawh a, July 19 leh 24 hian intlansiak pahnih chu inhnaih deuh taka neih theih an inring.