Dhoni a chawl - Raina-a'n a hnung a zui

Khelmual chhunga a mizia dam dap leh 'cool' tak avanga 'Captain Cool' tia hminglem an pek Mahendra Singh Dhoni chuan international cricket a chawlhsan thu a puang a, Suresh Raina chuan a captain hlui hnung a zui ve nghal. 

MSD chuan, "Mi inthlawpna leh hmangaihna zawng zawngah lawmthu ka sawi a, tun aṭang chuan ka chawl tawhah in lo ngai dawn nia," tiin a sawi a, international cricket chu a mangṭha ta. Cricketer piang tawh zinga ropui ber pawla chhal ngam Mahi hian international cricket chauh a chawlhsan leh san loh sawi tel lo mah se phai lam media chuan Indian Premier League-ah chuan a la inlan tur thu an sawi. 

Suresh Raina pawhin instagram kaltlanga a chawlh thu puang ve zuiin, "Inchuannaa khat ka thinlung nen hian i kawng zawh chu rawn zawh ve ka thlang e, Mahi. India, ka lawm e," tiin international cricket a mangṭha. 

April 5, 2005 kha cricket khawvelin Mahi a hmelhriat ṭanna tak tak a ni. Vishakhapatnam khawpuia ODI series match hnihna Pakistan nena an khelh ṭumin Dhoni hian ball 123-ah run 148-a vaw chhuak tehreng a nih kha!

Amah vekin a khum leh tak -  Indian wicketkeeper-in match khata run an siam hnem ber record a siam a, Indian media zawng zawng a luah a, chanchinbu phek hma chu Ranchi khaw tlangval, sam sei thlalakin a khat vek. Mahi a hawi kir leh tawh lo. Kum 2007-a thlen meuh chuan India captain a ni a, World Twenty20 2007, World Cup 2011, Champions Trophy 2013-ah te a champion pui a, Asia Cup-ah vawi hnih a champion bawk - ODI match 350-a run 10,773 a siam chu ODI chanchina run siam hnem 11-na a ni phak a, kum 2014-a test cricket a chawlhsan hma khan India chu ICC ranking-ah pakhatna a nihpui. 

International match 322-ah (200 ODI, 60 Test & 72 T20) captain nichungin India a kaihruai a, ODI bikah hian vawi 110-a chakpui -  Australia captain Ricky Ponting (165) chu ODI captain nichunga chak hnem lama a tluk loh awmchhun a ni. 

Kum 39 mi ni chungin Dhoni-a'n international cricket a chawlhsan thu a puang a, kum 33 mi 'lek' nichungin international cricket aṭangin Raina a chawl ve zui. Player pahnih hian India Independence Day vawi 73-naa chawlh an puan rual chhan a awm - ruahman sa a ni. 

Player pahnih hian IPL khel turin Chennai Super Kings pre-season camp chu a rualin an zawm a, ruahmanna an siam - Dhoni hian number 7 a ha a, Raina hian 3 a ha thung. Number pahnih dah dun chu 73 a ni a, Independence Day 73-na nen a in mil chiah avangin player pahnih hian August 15-ah chawlh an puang ta niin phai lam media chuan an tarlang. 

World Cup 2011-a India an champion ṭuma player zinga mi Raina hian kum 2010 khan India tan a test match hmasa ber a khel a, century a siam nghal - Indian cricketer zinga ODI, Test leh T20-a century siam vek thei hmasa ber a ni. Indian player zinga, IPL, Champions League Twenty20 leh T20I-a century siam vek thei hmasa ber leh awmchhun a ni a, IPL-a run 5,000 siam tling hmasa ber a ni bawk.

Sachin Tendulkar: 

Dhoni, Indian cricket tana i hnathawh hi a ropui takzet - nang nena World Cup nomawi kan chawi kha ka hun 

tawna hlimawm ber chu a ni. 

Suresh, India tana i career duhawm tak avangin ka lawmpui che. Kan partnership kha theihnghilh harsa a la ni reng a, 

i test match hmasa bera kan titi pawh kha ka la hre reng e. 

Virat Kohli:

Dhoni, India tana i hnathawh kha mi thinlungah a cham reng tawh ang a, khelmuala min zah derna leh duhsakna kha ka hre reng ang. Khawvel chuan i hnathawh a hmu a, keichuan nangmah ka hmu che. Captain, engkimah ka lawm a, zahna chibai ka buk che a ni. 

Suresh, a sang ber thleng theia i carrer duhawmah ka lawmpui che a, i kal zelna turah duhsakna ka hlan che a ni. 

England wicketkeeper Jos Buttler:

Kei leh mi maktaduai tam tak te ngaihsan rawn, 

i international career duhawm tak avangin Dhoni ka lawmpui che. Nang ka hmachhawn thei che kha ka inchhuang takzet a ni. 

England legend Michael Vaughan:

World Cup 2011 kha Tendulkar thlahna a ni a, Dhoni 

thluak hmanga hlawhchhuah a ni thung. ODI captain ṭha ber leh finisher ropui ber a ni a, i hnathawh zawng zawng avangin kan lawm e.

Shahid Afridi: 

Dhoni - Indian cricket legend zinga mi a ni a, khawvela captain ropui ber pawl a ni bawk. 

Dhoni & Raina ODI partnership

Innings    73

Runs    3585

Average    56.90

World Cup 2011 champions

Champions Trophy 2013 champions