Der Klassiker Dortmund an chesual, Bayern 'BAWK'

Bundesliga-a inkhel ngaihven hlawh 'Der Klassiker' emaw 'German Clasico' emaw an tih mai Bayern Munich leh Borussia Dortmund inkhelah minute 43-naa Joshua Kimmich goal hmangin Bavarians-in hnehna an chang. Germany lamah chuan an ti nek nek a, Bayern Munich 'BAWK' an champion leh dawn.

Hansi Flick-a hoten an elpui ber Dortmund an hneh avangin point 64 an hmu a, match ruk khelh tur la awmah point sarihin an sang fal. Bayern hi season sarih chhung a zawnin Bundesliga-ah an champion tawh a, a vawi riatna tur an hlat ta lo.

Dortmund khelmual Signal Iduna Park-ah hian entu 81,365 an leng a, ṭantu ruhkawl awm khawmna 'Yellow Wall' an tih maiah chuan mi 25,000 vel zet an leng. Mi sing hnih sang nga vel zet kawr eng haa an zai rual ṭhin hi an khingpuite pawhin hmachhawn harsa an tih ber a ni ṭhin.

Germany leh Bayern Munich legend Bastian Schweinsteiger pawhin player leh manager lam ni loin Dortmund mualah chuan 'Yellow Wall' chu a hlauh ber a nih thu a lo sawi tawh. Tun ṭumah erawh Covid-19 vangin inkhel entu an awm lo a, German Clasico boruak ti nun belhchhahtu 'Yellow Wall' tel lo chuan khuang loa chai ang chauh a ni.

Chutihrualin TV lama inkhel entute tan erawh stadium ruak hunga inkhel a ni nachungin mipui thawm siam chawp dah tel a ni a, inkhel en tihnawm phah mah se thawm siam chawpin mipui thawm tak tak a pha lo hle.

English rawlthar duhawm Jadon Sancho-a'n thawm a nei lian a, Dortmund forward hi match pawimawhah 100% fitness a neih loh avangin bench-ah dah a ni. Lucien Favre-a'n captain Marco Reus a chhawr thei lo a, Dortmund-in kim takin Bayern hmachhawn thei lo mah se inkhel pawimawhna erawh a ngai reng.

Dortmund-in second 60 chhungin goal hlauhawm an nei nghal a, Julian Brandt-a through ball chu Thorgan Hazard-a'n a lak hmain Bayern keeper Manuel Neuer inrawlh hman mah se a per chu Erling Haaland zawnah chiah a tla. Norwegian striker hian Der Klassiker a khelh hmasak berah Neuer-a kap karah pet lut mah se goalline aṭangin Jerome Boateng-a'n a pet chhuak.

Mualneitu an khel ṭha chhunzawm a, Raphael Guerreiro tauh luh chu offside vangin pawm a ni lo. Covid-19 nghawng a lang a, Dortmund leh Bayern inkhelah pawr lai a awm a, duh thala training an neih theih loh avang leh inbuatsaihna hun an ngah tawk loh avangin manager pahnihin an game duh danin an nawt mam hman lo niin a lang.

Bayern-in lei rem an rap a, Dortmund tlarhnung a phui lo. Bavarians forward Serge Gnabry-a'n keeper Roman Burki dan hman lohin pet mah se Lukasz Piszczek-a'n goalline aṭangin a dang hman. Dortmund keeper Burki-a'n Kingsley Coman leh Leon Goretzka te goal khung tur a dang.

Bavarians-in goal hlauhawm nei chho mah se an che ṭha zawk tih tur an ni bik lo a, Haaland-a'n mikhual tlarhnung a chhaih buai ve fo. Amaherawhchu hun pawimawhah Bayern danglamna a lang a, Joshua Kimmich-a'n yard 20 aṭangin a chip a, keeper Burki tana mualphona tawk vel niin minute 43-naah Bavarians-in 1-0 in hma an hruai.

Lucien Favre-a'n siphurh sut tumin Jadon Sancho leh Emre Can a luhtir nghal a, substitution panga a siam theih avangin pahnih ṭhawt a thlak hi a mak lo. Second half-ah chance an nei ve ve a, Dortmund an vanduai zawk.

Minute 59-naah goal khung thei bik striker Haaland-a'n hnai tak aṭangin chance a nei a, vawi khat ennaah a pet out ni maiin a lang. Replay-ah erawh Bayern defender Jerome Boateng-a kiu chu ball-in a fuh hnuah a out a, khawih lo se goal ngei turah a ngaih theih.

Hetiang hun atana an siam 'VAR' hman a ni lo a, penalty ni ngei turin lang mah se pek an nih miau loh avangin Dortmund an vanduai. Minute 80-naah Dortmund midfielder Mahmoud Dahoud-a'n goal-ah ṭha takin a pet a, Bayern si ban nghaktu Neuer a ni tlat! Bayern-in goal an chhuah lo a, Kimmich-a goal hmangin hnehna an chang.

Bayern kutah engkim a awm ta. Point sarihin kan inthlau a, keini tan chuan kan hmabak match-a hnehna chan bak tih theih kan nei tawh lo. 

An ṭhatzia kan hria a, chutihrualin an chetsual changin theihtawp kan chhuah zui ang. 

- Mats Hummels, Borussia Dortmund defender 

Ka goal khung tawha mawi ber leh pawimawh ber a ni hial ang. Keeper-in goalline a pel kha ka hmu lo a, mahse inkhelh hmain Burki-a'n goalline a pel nasa ṭhin tih min hrilh. Risk ka la a, ka vannei tel bawk a ni.

- Bayern tana goal khungtu Joshua Kimmich

Club ka enkawl hmasak ber season-ah nomawi ka chawi nghal ang em? hetiang lama suangtuahna hmang chi ka ni lo. Thlasik chawlh hma khan point liin kan hniam a, tunah point sariha kan fal hi ka lawm. Hlawhtling tura kan tih tur hi chu kan hre tlang. Covid-19 zawha kan inkhelh hnua kan match hmasa pathum kan hmachhawn ang reng hian match dang pawh kan hmachhawn a ṭul - inthlahdah a thiang lo.

- Hans-Dieter Flick, Bayern Munich manager

Bul kan ṭan ṭha a, amaherawhchu a tawp kan thleng thei lo. Kan chak tak loh avangin point sarihin  kan pha lo a, nomawi beisei a harsa tawh ang.

- Lucien Favre, Borussia Dortmund manager