Chelsea tan Newcastle an ṭha mah mah

Chelsea-in Premier League champion lai Manchester City chelhin insiamṭhaah inngai mah se hliam ngah Newcastle United lakah 4-1 in an mualpho. Blues tan Magpies an ṭha mah mah a, Mauricio Pochettino leh a hote tan season thara Champions League khelh phak pawh a harsa dawn.

Goal nga chu

St James Park-ah Alexander Isak-a'n minute 13-na lekah goal hmahruai a khung a, Isak-a finishing a ṭhat bakah kum 17 mi Lewis Miley ball pek a ṭha hle. Chelsea defender Marc Cucurella dinna erawh a dik lo a, a awm fual avangin Isak-a hi offside trap-ah an awk lo.

Goal khat vangin Blues an beidawng lo a, minute 23-naah Raheem Sterling-a'n box pawn chiah aṭangin freekick hmangin a khung. Sterling hian a pet ṭha bawk a, keeper Nick Pope-a'n a en liam. Halftime thleng hi chuan goal-ah chauh ni loin khelh danah pawh an intluktawk.

Second half-ah Anthony Gordon a hmuhnawm a, minute 60-naah Gordon-a ball vawrhluh ṭha zet chu Jamaal Lascelles-a'n a tauh lut. Magpies defender Lascelles-a'n vengtu a nei lo a, Cucurella leh Benoit Badiashile mawhpuh tur zawngin an hawi nasa hle.

Blues vanduai a kaltluang a, tawnhriat nei ṭha ber Thiago Silva ball pet turh chu Joelinton-a'n bel chhunga sa a hlah lo. Minute hnih chhunga Magpies-in goal hnih an khung avangin vawi leh khatah inkhel a thi vek.

Chak nemgngheh nan Gordon-a'n minute 83-naah Almiron-a ball pass chu mual vei lam aṭanga lalutin goal kilah a pet lut a, Newcastle 4-1 in an chak.

Lawm leh lawm lo

Newcastle manager Eddie Howe chuan, "Player inhliam kan ngah avangin rilru fiahna a ni ber a, player-te mawhphurhna la turin kan beisei a, kan ngenna an tihhlawhtlin avangin chak pawh kan phu a ni. Jamaal Lascelles, Kieran Trippier leh Matt Ritchie te khan team hruaitu an nihna an lantir a, tlawm an duh lo. Kan khelh dan leh kan result kha lawmna tur hlir a ni," tiin a sawi.

Magpies manager a lawm laiin Chelsea manager Mauricio Pochettino erawh a thinur hle. Poch hi hrem vangin technical area-ah a awm thei lo a, mipui zing aṭangin inkhel a en. Chelsea boss Pochettino chuan, "Kan khelh dan kha thlir ila, kan inkhel pawimawhna kha kan hre lo. Goal kan chhuah ho lam a, ball inchuhna reng rengah khan kan nem em em bawk. Kan khelh dan khan min ti thinur a, ka lungawi lo bawk," tiin a sawi.

Newcastle United hian November 27, Thawhlehni zan hian Paris-ah PSG an tlawh dawn a, Chelsea erawh Europe inelnaa an tel phak loh avangin December 3, Pathiannia Brighton nen an inkhel tur chu an inkhelh leh hmasak ber tur a ni ang.