Mizoramin Manipur an hneh

India ram pum cricket under 19 mipa team inelna Cooch Behar Trophy 2023-2024 khelh laiah, Inrinnni khan Mizoram chuan an group match-ah Manipur lakah wicket riatin hnehna an chang.

Gokulbhai Somabhai Patel Stadium - Nadiad, Gujarat-ah inkhelh niin, 1st innings-ah Manipur ten an bat hmasa a, run 113 siamin an out vek. Sihphir rawlthar Isaak VL Ngaihzuala chuan over sarih a vawmah run 19 pein wicket li a la.

K. Vanrotlinga leh Prem Layak ten wicket hnih ve ve an la a, run 113 umin Mizoram hian run 100 chauh an siam. Run 33 siamtu F. Lalnunkima'n vaw chhuak hnem ber mah se duhkhawp a tling zo mai lo.

2nd innings-ah Manipur lamin rum 13 a hmahruai chungin an bat a, dinhmun ṭha viau tura ngaih ni mah se run 68 chauh an siam - ngam loh an nei. Manipur ngam loh chu Ramhlun Venglai rawlthar K. Vanrotlinga niin, ani hian over 13 a vawmah run 32 pein wicket sarih a la - hattrick a siam hial a ni.

Mizoram tan target 82 a ni a, chetsual theih erawh a la ni ve tho. Mahse, chesual nawn tawh loin wicket hnih chauh hlohin an target an umphak. Wicket sarih latu Vanrotlinga hian run 29 siamin a thi lo.

Plate group-ah Mizoram hi awmin, an match hmasa zawkah Meghalaya nen an inhnehtawk a, mahse, 1st innings hmahruaitu an nih avangin Mizoram hian full point an hmu. December 1, Zirtawpni hian Arunachal Pradesh nen an inhmachhawn leh ang. Nagaland leh Sikkim te an la hmabak bawk a ni.

Mizoram manager Michael Hmingthanpuia chuan, "Inkhel intum tawk takah a vawm ṭha zawk kan vannei. Coach Moinak Sengupta tawnhriat neih ṭhat kan chawr, kan ruahmanna tihlawhtling thei player-ten fak an phu hle.

"Cricket Association of Mizoram hmalaknain October aṭang khan Gurgaon-ah camp kan nei a, team ṭha tak takte nen kan awmhoin kan inhmachawn a, chumi rah chu tunah hian a lang," tiin Vanglaini a hrilh.