Dawngte, i te ber lo e

Chhinga Vengin Zote Toyota MPL10-ah bul ṭan ṭha lo mah se phase 2-ah erawh match thumah vawi thum an chak a, a sang pali zingah an tel bakah pakhatna Mizoram Police an phak lohna chu point hnih chauh a ni tawh. November 25, Inrinni khan Chhingcows hian Electric Veng 4-1 in an sawp a, goal li hi captain MS Dawngliana khung vek a ni.

RG Stadium-a inkhelah box chhungah ball-in Chhinga Veng defender Vanlalremruata kut a per avangin Electric Vengin penalty an hmu a, EFC captain C. Lalhriaptuia'n minute sarihna lekah goal hmahruai a khung. Goal luh hnuah pawh Chhingcows la insiamrem thei lawk lo mah se minute 20 chhoa an insiamrem meuh chuan team pahnih an inthlau hle.

Minute 25-naa Dawngtea goal hmahruai chu MPL10-a team goal mawi ber ang hiala chhal theih a ni a, wall pass hmanga Electric Veng tlarhnung an ṭhiah hnuah goal kilah a dah. EFC an talbuai zui a, minute hnih hnuah tlarhnung tihsual vangin penalty an chawi a, Dawngtea'n hmahruaina goal a khung belh.

Chhingcows-in Zonunmawia hmangin midfield an thunun a, tlarhnungah FC Lalhmunmawia leh Remruata te an inringtawk. Tlarhma lama awm PC Lallawmkima leh Lallawmsanga te vanneih ṭum ni se chuan goal tam zawk pawh an khung thei ang.

Khelmual chhungah Dawngtea a te ber pawl a ni a, mah se ball a chan tawh chuan EFC defender-ten ven ngaihna an hre lo. Bawngkawn forward hian goal hnih dang a khung belh leh a, pakhat zawkah hian defender a bum hnuah mawi zetin keeper a pet khum - a class takzet. Chhinga Veng 4-1 in an chak a, semifinal khel tura rinawm pawl an ni leh ta.