Venghnuaiin table mawngphah an chhuahsan

Zote Toyota MPL10-ah FC Venghnuai chuan November 25, Inrinni khan C. Ngurnuntluanga goal hmangin Project Veng FC 1-0 in an hneh a, Kolasib club nen an point hmuh inzat chiah mah se an goal difference a ṭhat zawk avangin table mawngphah chhuahsanin pasarihnaah an awm.

Inrinni tlai boruak a nuam a, Venghnuaiin ṭawiawmtu an neih ṭhat avangin hun rei tak hnuah MPL-ah inkhel entu thawm ring tham hriat tur a awm leh ta. Project Vengin an mualah anmahni ṭantu ṭhahnem tak nen Venghnuai an hneh a, nikum finalist hian entu puihna ṭha nen phuba an la.

Project Vengin fimkhur takin inkhel bul an ṭan a, amaherawhchu minute 45-naah C. Nuna'n Venghnuai hmahruaina goal a khung avangin second half-ah Kolasib club an fimkhur thei ta bik lo.

First half-ah Venghnuai chungnung mah se second half-ah erawh an inhnehtawk tawh a, chance pawh an inneih chhawk. Venghnuai substitute Lalremruata'n penalty hlawh chhuak mah se Eric Remruatpuia Chhangte pet chu keeper Malsawmtluanga'n a dansak. FCV hian penalty a zawnin vawi thum an hlah a, player hran vekin an pet.

Project Veng defender Khupminlun-a (K. Simte) vannei a, Venghnuai attack-na tur titawpin 'foul' mah se referee-in yellow card a pe lo - pe se chuan yellow card vawi hnihna tur a ni a, hnawhchhuah tur a ni. Hun tawpah erawh Project Veng an vanduai ta thung a, Venghnuai midfielder Vanlaldinpuia chu box chhung ngeiah handball niin lang mah se referee-in penalty a pek miau loh avangin point hmu loin Kolasib-ah an kir. Venghnuai erawh 1-0 in an chak a, MPL10-a hnehna an channa hmasa ber a ni.