Kane-a'n goal khung mah se hmahruaitu chu Bayer

Harry Kane-a'n Bayern Munich tan goal a khung chhunzawm zel a, Bundesliga-a hmahruaitu erawh champion lai Bayern Munich ni loin Xabi Alonso enkawl Bayer Leverkusen an ni. Leverkusen hian Inrinni zan khan Werder Bremen 3-0 in an hneh a, Bundesliga-a season bul ṭan ṭha record an nih rual. Alonso hian Bayern enkawl chung ni loin Leverkusen enkawl chunga Pep Guardiola kaihhruai Bavarians record a nihrual thei hi a ropui takzet.

Kane leh goal

Bayern Munich chuan Zirtawpni zan khan Cologne an tlawh a, minute 20-naah Kane-a'n goal awmchhun a khung. Bavarians hian inkhelh ṭantirh aṭangin chance an ngah hrim hrim a, Kane-a'n goal a khung hma hian chance vawi hnih a hlah tawh.

Goal luh theih nan hian Eric Maxim Choupo-Moting a thawh hlawk a, Cologne defender-in goalline aṭangin dang mah se a per chu goal ruakah Kane-a'n chiang takin a khung. Bayern hian inkhel thununin goal chance dang pawh nei leh mah se goal dang an khung tawh miah lo. Second half-ah Leroy Sane leh Kingsley Coman ten chance ṭha bik an hlah.

Kane hian league match 12 aṭangin goal 18 a khung tawh a, inelna hrang hrangah match 17 aṭangin goal 22 a khung tawh bawk. England captain Kane hian season khatnaah record thar a siam ngei a rinawm a, mahse nomawi chawi lo thei dinhmunah a ding.

A dal theitu Bayer

Xabi Alonso kaihhruai Bayer Leverkusen-in match 12 aṭangin vawi 11 an chak tawh a, vawi khat an inhnehtawk. Inrinni zanah pawh Werder Bremen lakah an chungnung hle.

Bremen player Olivier Deman-a'n an lamah tiluh hnuah Jeremie Frimpong leh Alex Grimaldo te hmangin an khung belh a, pakhatnaah an awm mek.

Leverkusen hi Bundesliga-ah chauh ni loin Europa League thlengin an che ṭha. Tun season match 17 an khelh tawh aṭangin vawi 16 an chak a, goal 62 khung tawhin vawi 14 chiah an chhuah. Bundesliga-a hmahruaitu an nih bakah Europa League-ah an group-ah pakhatna an ni.