Flick-a hnuaia harhtharna

Bayern Munich tan Bundesliga nomawi hi chiang saa ngaih a ni a, Pep Guardiola hnuaia awlsam taka season thum an champion hnu phei chuan Germany-ah Bavarians han ter pha an awm lo. Amaherawhchu Carlo Ancelotti meuh pawhin Pep-a thunun angin inelna a thunun thei lo a, Niko Kovac-a hnuaiah phei chuan champion nomawi chan thei dinhmunah an ding.

Croatian manager Kovac-a hmunruak luahtu Hans-Dieter Flick hnuaiah Bayern Munich-in harhtharna an chang. Flick-a'n Bayern a enkawl ṭantirh hian palina an ni a, match 24 aṭangin vawi 21 hnehna chanpuiin Bundesliga nomawi chu a chiang ṭan der a, German Cup-ah semifinal lut tawhin Champions League last 16 first leg-ah Chelsea 3-0  in an hneh bawk. Bayern hi Flick-a hnuaiah Bundesliga match 18-ah vawi 15 an chak a, hetiang ti thei chu Pep Guardiola chauh kha niin German club thuneitute an manager hnathawh avangin an lawm ang.

Flick hian defence laiah David Alaba a chhawr a, kum 19 mi Alphonso Davies chu left wing back-ah dahin rin phak bakin a che ṭha. Candian wing back Davies hian Dortmund nena an inkhelh ṭum hian 35.3km/h (21.9mph) zeta chakin a tlan a, hei hian a theihna thui tak a pholang. 

Bayern hian Davies zarah vei lam aṭangin na takin an nawr thei a, Kingsley Coman-a'n Davies-a tana kawng sialin mual laiah a lut a, Canadian wing back hian vei lam sir ruak a rawn hmang thiam ṭhin hle. Bavarians hi team pumpui angin an ṭha ve hrim hrim bawk. Dortmund-in an star striker Robert Lewandowski, Thomas Muller, Serge Gnabry, Kingley Coman leh Leon Goretzka te dang thei mah se goal khung turin Kimmich a la awm a, an squad chhahzia lantir a ni.

Chutihrualin Bavarians hian Thiago Alcantara inhliam an tuar tih a lang a, Spanish midfielder tel lo chuan an midfield a ṭha thaw khat viau nachungin kim lo lai a awm. A tawi zawngin Dortmund an kim loh ang thoin Bayern an kim lo a, match pawimawhah team huaisen zawk an danglam. Season liam ta khan Dortmund hi hun pawimawhah an tlu sawp tawh a, kuminah an la patuaina a lang nawn.