Goal khung lo Barca an chak zo lo

Rayo Vallecano khelmualah point hlawh chhuak turin Barcelona-in vanneihna an mamawh a, an mikhualna ramah minute 82-naa Florian Lejeune-a 'own goal' hmangin point an hlawh chhuak hram.

Barcelona hian international break hmaa an match hnuhnung bera Alaves hnehtu aṭangin player paruk ngawt an thlak danglam a, hliam vangin goalkeeper chhuanvawr Marc-Andre ter Stegen pawh a inlan thei lo.

German keeper aiah hian Inaki Pena chuan inkhel bul a ṭan a, Spanish keeper hi inkhel ṭantir aṭangin a nghing nghal a, Catalan club tan ngaih a ngam lo ang tih a chiang.

Rayo tan Unai Lopez chuan minunte 39-naah mawi zetin goal hmahruai a khung a, Barca-in a chhanletna tur nei loin chawlhlawk an hmang.

Barca boss Xavi-a'n tlawm thei an ni lo tih a hria a, bench lama a hahdamtir Manchester City captain hlui Ilkay Gundogan chu minute 55-naah Joao Felix nen a luhtir a, Barca-in inkhel an thunun zui.

Mahse, Spanish champion hian game thunun mah se a pawimawh ber goal an khung hleithei lo a, goal khung turin vanneihna an la mamawh cheu. Minute 82-naa Robert Lewandowski-a pressure pekna hnuaiah Lejeune talbuaiin an lamah a tilut a, 1-1 a ni.

Barcelona si phurh sut hun hi minute 82-na a ni tawh a, Catalan club tan goal dang khung zui turin hun a tam tawk lo.

Hetihlai hian Atletico Madrid chuan 1-0 in Real Mallorca an hneh a, Antoine Griezmann chuan inkhela goal awmchhun a khung - Atletico hi poathumnaah an chho nghal a, Barca erawh palinaah an awm.

Nizan khan hmahruaitu Girona leh pahnihna Real Madrid te an inlan a, he thu buatsaih a nih lai hian an result kan hre hman lo.