A chung berah Sreenidi an kir

I League-ah Sreenidi Deccan chuan nimin khan Namdhari 2-0 in an hneh a, Hyderabad club hi table chung berah an awm. Namdhari Stadium-a inkhelah mikhual team tan David Munoz leh Jagdeep Singh ten first half-ah goal an khung a, second half-ah Namdhari defender Sukhandeep Singh hnawhchhuah a nih bawk avangin Sreenidi-in chak turin harsatna an tawk lo.

Sreenidi tan hian Lalromawia'n inkhel bul a ṭan a, bench aṭangin B. Lalnuntluanga leh R. Lalbiakliana te an lut bawk. Inrinni khan Shillong Lajong-in an mualah Trau 2-1 inan hneh a, inkhel a tawp thlengin a nung ṭha hle.

Lajong hian an mualah match nga an khel zawn a, match hnuhnung pathumah an chak vek avangin table-ah pawh pathumnaah an awm pha hial. Chutihrualin Lajong hi Aizawl FC aiin match khatin an khel tam a, Mizo club hian khelh zat inangah an nihrual thei thung.