Blasters an sang ber

International break a zo a, Indian Super League pawh khelh a ni leh ta - Inrinni zan khan Kerala Blasters chuan table chung ber luah turin hnehna an chang a, tun season-a chak la nei lo Hyderabad chu 1-0 in an hneh.

Blasters tan Milos Drincic chuan inkhela goal awmchhun a khung a, Hyderabad lamin a chhanletna tur an neih loh avangin tun season ISL-ah chak an la nei lo tluang zel.

Hyderabad tan hian midfielder Mark Zothanpuia chuan inkhel bul a ṭan a, tun season-a a vawi khat nan Ramhlunchhunga chu bench aṭanga luhtir a ni bawk- ISL-a a match hmasa ber a ni.

Inrinni zan inkhel hmasa zawkah Chennaiyin FC leh East Bengal intawngin, chak zawk an awm lo a, team pahnih hi 1-1 a inhnehtawkin, point an insem.

Chennaiyin khelmualah East Bengal-in goal an khung hmasa zawk a, minute 29-naah Vishnu Puthiya Valappill-a ball cross chu Chennaiyin midfielder Ayush Adhikari chuan an lamah a tilut a, 1-0 a ni.

East Bengal hian he goal hi an chakpui mai dawn niin a lang hman a, inkhel thununtu Chennaiyin lamin goal an khung thei lo.

Hun tawp nan minute li chiah a awm tawh tihah South Indian club tan hun ṭha a her chhuak ve ta nge nge a, Ninthoinganba Meetei chuan si phurh sutna goal a khung - hun pek belhah Chennaiyin defender Ryan Edwards chu hnawhchhuah zui ni mah se, East Bengal tan chhawrna hun a awm tawh lo a, 1-1 in inkhel a tawp.

Kolkata club tan ṭum dang ang thoin Lalchungnunga'n inkhel bul a ṭan a, Chennaiyin lamin Mizoram player kawl an nei lo thung.