Djokovic hnehtu Sinner

Novak Djokovic tan hlawhtlinna zawng zawng chan vek theih a ni rih bik lo, a hmaah Jannik Sinner a lo ding tlat. Davis Cup semifinal-ah Sinner chuan Djokovic a hneh a, an ram Italy chu Serbia lakah hnehna 2-1 a chan puiin final a hruai thleng.

Semifinal a hmuhnawm, singles rubber hmasa zawkah Miomir Kecmanovic chuan Lorenzo Musetti 6-7 (7-9), 6-2, 6-1 a hnehin Serbia dinhmun a ṭha hmasa. Mahse, Sinner chuan Italy beiseina siam turin Djokovic 6-2, 2-6, 7-5 in a hneh.

Ram pahnihte 1-1 in an intluktawk ta chiah a, doubles hmangin a tlang tur chinfel a ngai. Italy tan Sinner leh Lorenzo Sonego te rawn ding chhuakin, an khingpui Djokovic leh Kecmanovic te inkawp chu 6-3, 6-4 a hnehin 2-1 in an tlang.

Semifinal lehlamah Australia chuan Finland an hneh ve bawk - nizan khan nomawi inchuh zui nghal niin, chanchin buatsaih laiin result kan hre hman lo.

World number 1 Djokovic-a'n Grand Slam nomawi 24 a la tawh a, la hnem ber a ni. World number 1 nih rei zawngah pawh midang chunga leng a ni, tun hnai khan an ram tan Davis Cup lak a duh thu a sawi, hei erawh a ti hlawhtling thei ta rih bik lo, kum dang a nghah leh rih a ngai dawn a ni.