Serie A khel thei naupang ber Camarda

Francesco Camarda chuan kum 15 leh ni 260 mi lek ni chungin AC Milan tan Serie A a khel a, Italy rama football inelna sang berah hian inlan thei naupang ber record a siam.

Inrinni zan khan AC Milan chuan an mikhual Fiorentina chu 1-0 in an hneh, goal awmchhun hi The Hernandez-a'n chawlhlawk hma chiaha penalty aṭanga a khung a ni a, point thum hmuh nan a tawk.

Milan tan hian Camarda hi minute 83-naah a lut. Tun hma lama record lo chelh tawhtu chu Bologna tana khel Wisdom Amey niin, ani hian kum 15 leh ni 274 mi ni chungin Serie A match hmasa ber a lo khel tawh a ni.

Striker tawnhriat ngah Olivier Giroud chu hrem a ni a, hliam vangin Noah Okafor a khel thei lo bawk - coach Stefano Pioli chuan a hmatawng pahnih an awm loh karah hian Camarda hi a ko a ni.

Inrinni zan Serie A inkhel dangah Napoli chuan Atalanta 2-1 in an hneh a, coach Walter Mazzarri chuan an inkhel chu duhthusam vek la ni lo mah se a ṭha thawkhat hle tawh tih a sawi a, duhthusam anga an thlen theih ngei a beisei thu a sawi bawk.